hamare mai-kade ka ab nizam badlega

hamāre mai-kade kā ab nizām badlegā

ham apnā saaqī badal deñge jaam badlegā

abhī to chand hī mai-kash haiñ baaqī sab tishna

vo vaqt aa.egā jab tishna-kām badlegā

ye ulTī ulTī havā.eñ haiñ vaj.h-e-sust-ravī

havā.eñ badleñgī tarz-e-ḳhirām badlegā

badaltī rahtī haiñ qadreñ rahīl-e-vaqt ke saath

zamāna badlegā har shai kā naam badlegā

ham apnī talḳh-navā.ī meñ rañg bhar deñge

hamāre saath hamārā kalām badlegā

ye arsh o farsh kī tafrīq kuchh nahīñ 'vāmiq'

buland o past kā meyār-e-ḳhām badlegā

hamare mai-kade ka ab nizam badlega

hum apna saqi badal denge jam badlega

abhi to chand hi mai-kash hain baqi sab tishna

wo waqt aaega jab tishna-kaam badlega

ye ulTi ulTi hawaen hain wajh-e-sust-rawi

hawaen badlengi tarz-e-KHiram badlega

badalti rahti hain qadren rahil-e-waqt ke sath

zamana badlega har shai ka nam badlega

hum apni talKH-nawai mein rang bhar denge

hamare sath hamara kalam badlega

ye arsh o farsh ki tafriq kuchh nahin 'wamiq'

buland o past ka meyar-e-KHam badlega