hamare pas falak se jawaz-e-jang nahin

hamāre paas falak se javāz-e-jang nahīñ

ki ye zamīn abhī ham pe itnī tang nahīñ

bikhar rahe haiñ sitāre mire ḳhayāl ke saath

mire junūñ kā magar āsmāñ pe rang nahīñ

sar-e-mizha koī gauhar chamak uThā shāyad

hazār shukr abhī aa.ine pe zang nahīñ

shikār-e-tīr-e-nazar huuñ mujhe ḳhabar hai ye

jigar ke paar jo utre vahī ḳhadang nahīñ

uThā.e phirte to haiñ ā.inoñ ko hāthoñ meñ

magar ye log abhī āshnā-e-sang nahīñ

lahū meñ kaisī ye pazhmurdagī utar aa.ī

hazār sa'ī kareñ par koī tarang nahīñ

'nadīm' kaun sā hairat-kada hai un kī talab

haiñ kis mizāj kī āñkheñ ki ab bhī dang nahīñ

hamare pas falak se jawaz-e-jang nahin

ki ye zamin abhi hum pe itni tang nahin

bikhar rahe hain sitare mere KHayal ke sath

mere junun ka magar aasman pe rang nahin

sar-e-mizha koi gauhar chamak uTha shayad

hazar shukr abhi aaine pe zang nahin

shikar-e-tir-e-nazar hun mujhe KHabar hai ye

jigar ke par jo utre wahi KHadang nahin

uThae phirte to hain aainon ko hathon mein

magar ye log abhi aashna-e-sang nahin

lahu mein kaisi ye pazhmurdagi utar aai

hazar sa'i karen par koi tarang nahin

'nadim' kaun sa hairat-kada hai un ki talab

hain kis mizaj ki aankhen ki ab bhi dang nahin