hamare pas hai hikmat na raaz kya kije

hamāre paas hai hikmat na raaz kyā kiije

sivā.e dard-e-dil-e-jāñ-gudāz kyā kiije

ināyateñ haiñ agarche hazār-hā lekin

bane na baat to banda-navāz kyā kiije

na zarb-o-tār se rishta na dil-fareb-e-dam

mire ḳhayāl ko aalam hai saaz kyā kiije

ze-rū-e-fiqh jo sab se ziyāda hai ma.atūb

hamārī us se bhī hai sāz-bāz kyā kiije

jo jānte haiñ nahīñ jānte na jaane haiñ

jo hai ayaañ yahāñ vo bhī hai raaz kyā kiije

jahāñ guzārish-e-ahvāl par hoñ ta.azīreñ

sivā.e jur.at-e-arz-e-niyāz kyā kiije

khulā ik umr kī koshish se ye ki likkhā hai

hamāre naam nasheb-o-farāz kyā kiije

burā ho lazzat-e-taḳh.īl kā ki rahtī hai

haqīqatoñ meñ talāsh-e-majāz kyā kiije

hazār dard hai aur jān-e-nā-tavāñ merī

ilaaj hai na gale kā javāz kyā kiije

hamare pas hai hikmat na raaz kya kije

siwae dard-e-dil-e-jaan-gudaz kya kije

inayaten hain agarche hazar-ha lekin

bane na baat to banda-nawaz kya kije

na zarb-o-tar se rishta na dil-fareb-e-dam

mere KHayal ko aalam hai saz kya kije

ze-ru-e-fiqh jo sab se ziyaada hai matub

hamari us se bhi hai saz-baz kya kije

jo jaante hain nahin jaante na jaane hain

jo hai ayan yahan wo bhi hai raaz kya kije

jahan guzarish-e-ahwal par hon taziren

siwae jurat-e-arz-e-niyaz kya kije

khula ek umr ki koshish se ye ki likkha hai

hamare nam nasheb-o-faraaz kya kije

bura ho lazzat-e-taKHil ka ki rahti hai

haqiqaton mein talash-e-majaz kya kije

hazar dard hai aur jaan-e-na-tawan meri

ilaj hai na gale ka jawaz kya kije