hamare sath ajab hi muamla hua hai

hamāre saath ajab hī muāmla huā hai

havā Thahar sī ga.ī hai diyā jalā huā hai

usī maqām pe ik qāfila rukā huā hai

jahāñ tumhārā mirā rāsta judā huā hai

na jaane bād-e-sabā kah ga.ī hai kaan meñ kyā

ki phuul shāḳh-e-burīda pe bhī khilā huā hai

mile ik umr ke ba.ad aur is tarah se mile

vo chup hai aur hamārā bhī sar jhukā huā hai

dayār-e-mahr kī sarhad talāsh karne ko

mah o nujūm kā ik qāfila chalā huā hai

haqīqateñ to aTal haiñ badal nahīñ saktīñ

magar kisī kī tasallī se hausla huā hai

bajā.e do ke baje ek haath se taalī

muāmalāt meñ aisā kabhī bhalā huā hai

mirī umiid kā hai terī aarzū kā hai

diyā hai aur baḌī der se jalā huā hai

umiid khil sī ga.ī hai mahak uThā hai ḳhayāl

sabā kī narm sī dastak pe dil ko kyā huā hai

mahak rahā hai mire ḳhaar ḳhaar jīvan meñ

vo lamha jo abhī mujh meñ gulāb sā huā hai

hamare sath ajab hi muamla hua hai

hawa Thahar si gai hai diya jala hua hai

usi maqam pe ek qafila ruka hua hai

jahan tumhaara mera rasta juda hua hai

na jaane baad-e-saba kah gai hai kan mein kya

ki phul shaKH-e-burida pe bhi khila hua hai

mile ek umr ke baad aur is tarah se mile

wo chup hai aur hamara bhi sar jhuka hua hai

dayar-e-mahr ki sarhad talash karne ko

mah o nujum ka ek qafila chala hua hai

haqiqaten to aTal hain badal nahin saktin

magar kisi ki tasalli se hausla hua hai

bajae do ke baje ek hath se tali

muamalat mein aisa kabhi bhala hua hai

meri umid ka hai teri aarzu ka hai

diya hai aur baDi der se jala hua hai

umid khil si gai hai mahak uTha hai KHayal

saba ki narm si dastak pe dil ko kya hua hai

mahak raha hai mere KHar KHar jiwan mein

wo lamha jo abhi mujh mein gulab sa hua hai