hamare sath jise maut se ho pyar chale

hamāre saath jise maut se ho pyaar chale

koī chale na chale ham to sū-e-dār chale

na daur-e-jām na ab qissa-e-bahār chale

unhīñ kā zikr chale aur baar baar chale

ruḳh-e-zamāna badalne chale the dīvāne

tire huzūr magar kis kā iḳhtiyār chale

hayāt-e-ishq kā hāsil the bas vahī lamhe

jo terī anjuman-e-nāz meñ guzār chale

udhar manā.e ga.e ḳhuub jashn-e-dār-o-rasan

kafan-ba-dosh jidhar tere jāñ-nisār chale

ye ġham nahīñ ki hamīñ ko yahāñ amaañ na milī

ḳhushī ye hai ki tirī anjuman sañvār chale

hamīñ chaman meñ payām-e-bahār laa.e the

chaman se le ke hamīñ hasrat-e-bahār chale

mirī taraf se mubārak ho ahl-e-gulshan ko

jo mere ba.ad kabhī bād-e-nau-bahār chale

ye inqalāb ajab hai ki mai-kade se 'shamīm'

kidhar ye teġh-ba-kaf ho ke bāda-ḳhvār chale

hamare sath jise maut se ho pyar chale

koi chale na chale hum to su-e-dar chale

na daur-e-jam na ab qissa-e-bahaar chale

unhin ka zikr chale aur bar bar chale

ruKH-e-zamana badalne chale the diwane

tere huzur magar kis ka iKHtiyar chale

hayat-e-ishq ka hasil the bas wahi lamhe

jo teri anjuman-e-naz mein guzar chale

udhar manae gae KHub jashn-e-dar-o-rasan

kafan-ba-dosh jidhar tere jaan-nisar chale

ye gham nahin ki hamin ko yahan aman na mili

KHushi ye hai ki teri anjuman sanwar chale

hamin chaman mein payam-e-bahaar lae the

chaman se le ke hamin hasrat-e-bahaar chale

meri taraf se mubarak ho ahl-e-gulshan ko

jo mere baad kabhi baad-e-nau-bahaar chale

ye inqalab ajab hai ki mai-kade se 'shamim'

kidhar ye tegh-ba-kaf ho ke baada-KHwar chale