hamare zehn mein mahshar bapa hai kya kiya jae

hamāre zehn meñ mahshar bapā hai kyā kiyā jaa.e

ye dil āmāda-e-tark-e-vafā hai kyā kiyā jaa.e

musalsal bārish-e-sañg-e-sadā hai kyā kiyā jaa.e

yahī merī vafāoñ kā sila hai kyā kiyā jaa.e

laboñ tak aa ke sab harf-e-shikāyat TuuT jaate haiñ

ajab andāz se vo dekhtā hai kyā kiyā jaa.e

bichhaḌ kar aap se jiine kī ḳhvāhish kufr hai lekin

hamārī zindagī hī be-hayā hai kyā kiyā jaa.e

ye maanā ḳhvāb hai ai zaḳhm-e-nau terī ḳhalish lekin

yahāñ pahle hī ik mela lagā hai kyā kiyā jaa.e

hamesha sochte rahnā bhī kuchh achchhā nahīñ hotā

magar shā.ir hamesha sochtā hai kyā kiyā jaa.e

vo insāñ jo mirā hamrāz hai ham-zād hai 'qaisar'

vo mujh se aaj tak nā-āshnā hai kyā kiyā jaa.e

hamare zehn mein mahshar bapa hai kya kiya jae

ye dil aamada-e-tark-e-wafa hai kya kiya jae

musalsal barish-e-sang-e-sada hai kya kiya jae

yahi meri wafaon ka sila hai kya kiya jae

labon tak aa ke sab harf-e-shikayat TuT jate hain

ajab andaz se wo dekhta hai kya kiya jae

bichhaD kar aap se jine ki KHwahish kufr hai lekin

hamari zindagi hi be-haya hai kya kiya jae

ye mana KHwab hai ai zaKHm-e-nau teri KHalish lekin

yahan pahle hi ek mela laga hai kya kiya jae

hamesha sochte rahna bhi kuchh achchha nahin hota

magar shair hamesha sochta hai kya kiya jae

wo insan jo mera hamraaz hai ham-zad hai 'qaisar'

wo mujh se aaj tak na-ashna hai kya kiya jae