hamari aankh se aksar nazare chhuT jate hain

hamārī aañkh se aksar nazāre chhūT jaate haiñ

safar meñ ham-safar ban kar hamāre chhūT jaate

hamāre haath se ḳhushiyāñ nikal jaa.eñ to ġham kaisā

falak ke haath se bhī to sitāre chhūT jaate haiñ

kabhī kashtī mirī ḳhud chhoḌ detī hai kināroñ ko

kabhī aisā bhī hotā hai kināre chhūT jaate haiñ

nadāmat ke kabhī do-chār aañsū bhī zarūrī haiñ

ye vo paanī hai jis se daaġh saare chhūT jaate haiñ

ḳhayāl aatā hai jab tum se bichhaḌ kar zinda rahne kā

pasīne tan-badan se Dar ke maare chhūT jaate haiñ

bure manzar na phir 'vājid' tumhāre sāmne aa.eñ

vo yaad aate haiñ to ashko ke dhāre chhūT jaate haiñ

hamari aankh se aksar nazare chhuT jate hain

safar mein ham-safar ban kar hamare chhuT jate

hamare hath se KHushiyan nikal jaen to gham kaisa

falak ke hath se bhi to sitare chhuT jate hain

kabhi kashti meri KHud chhoD deti hai kinaron ko

kabhi aisa bhi hota hai kinare chhuT jate hain

nadamat ke kabhi do-chaar aansu bhi zaruri hain

ye wo pani hai jis se dagh sare chhuT jate hain

KHayal aata hai jab tum se bichhaD kar zinda rahne ka

pasine tan-badan se Dar ke mare chhuT jate hain

bure manzar na phir 'wajid' tumhaare samne aaen

wo yaad aate hain to ashko ke dhaare chhuT jate hain