hamari jab hamari ab hamari kab se kya matlab

hamārī jab hamārī ab hamārī kab se kyā matlab

ġharaz un ko ġharaz se kyā ġharaz matlab se kyā matlab

azīz-o-aqribā par be-sabab vo zulm Dhātā hai

ḳhatā-vār-e-mohabbat to hamīñ haiñ sab se kyā matlab

agar ham jaan dete haiñ to un ke husn-e-sūrat par

hameñ bartāv se andāz se yā Dhab se kyā matlab

ḳhudā kā naam bhī lete hue maiñ hichkichātā huuñ

vo pūchheñge tumhārā na.ara-e-yārab se kyā matlab

vafā.eñ kījiye pichhlī jafā.eñ bhuul jā.eñgī

agar matlab hai to ab se hameñ hai jab se kyā matlab

alag aanā alag jaanā alag rahnā alag phirnā

rah-e-ulfat meñ sab ko ham se ham ko sab se kyā matlab

jo mazmūn-e-ḳhat-e-pur-shauq merā vo nahīñ paḌhtā

ye matlab hai ki mujh ko ma.anī-o-matlab se kyā matlab

agar maiñ pūchhtā huuñ aap mere ghar kab ā.eñge

to vo kahte haiñ ā.eñge magar is kab se kyā matlab

na maz.hab hai na mashrab hai koī ham bāda-ḳhvāroñ kā

hameñ mashrab se kyā nisbat hameñ maz.hab se kyā matlab

amīr-e-ḳhud-ġharaz hī ko ġharaz matlab se matlab hai

faqīr-e-be-ġharaz ko hai ġharaz matlab se kyā matlab

zamāna ġharq-e-bahr-e-ġham jo hotā hai to hone do

tum apnī ḳhair māñgo 'nūh' tum ko sab se kyā matlab

hamari jab hamari ab hamari kab se kya matlab

gharaz un ko gharaz se kya gharaz matlab se kya matlab

aziz-o-aqriba par be-sabab wo zulm Dhata hai

KHata-war-e-mohabbat to hamin hain sab se kya matlab

agar hum jaan dete hain to un ke husn-e-surat par

hamein bartaw se andaz se ya Dhab se kya matlab

KHuda ka nam bhi lete hue main hichkichata hun

wo puchhenge tumhaara nara-e-yarab se kya matlab

wafaen kijiye pichhli jafaen bhul jaengi

agar matlab hai to ab se hamein hai jab se kya matlab

alag aana alag jaana alag rahna alag phirna

rah-e-ulfat mein sab ko hum se hum ko sab se kya matlab

jo mazmun-e-KHat-e-pur-shauq mera wo nahin paDhta

ye matlab hai ki mujh ko mani-o-matlab se kya matlab

agar main puchhta hun aap mere ghar kab aaenge

to wo kahte hain aaenge magar is kab se kya matlab

na mazhab hai na mashrab hai koi hum baada-KHwaron ka

hamein mashrab se kya nisbat hamein mazhab se kya matlab

amir-e-KHud-gharaz hi ko gharaz matlab se matlab hai

faqir-e-be-gharaz ko hai gharaz matlab se kya matlab

zamana gharq-e-bahr-e-gham jo hota hai to hone do

tum apni KHair mango 'nuh' tum ko sab se kya matlab