hamdamo lutf-e-shabana ho chuka

hamdamo lutf-e-shabāna ho chukā

aish-o-ishrat kā zamāna ho chukā

ab ġham-o-shādī se āzādī milī

rañj-o-rāhat kā zamāna ho chukā

najd meñ āvāra kyoñ phirtā hai qais

mahmil-e-lailā ravāna ho chukā

manzil-e-dil meñ thiiñ kyā kyā hasrateñ

qāfila ye bhī ravāna ho chukā

zindagī ġham kī kahānī rah ga.ī

aish kā rañgīñ fasāna ho chukā

ho ga.ī vīrāñ vo bazm-e-mai-kada

daur-e-sāġhar kā zamāna ho chukā

ab nahīñ bazm-e-chaman rañgīñ-navā

andalīboñ kā tarāna ho chukā

mutrib-e-ayyām ne badlā hai ThāTh

shauq kā chañg-o-chaġhāna ho chukā

mauj-e-muztar ko huā āḳhir qarār

shor-e-tūfāñ kā zamāna ho chukā

'nāzir' ab zauq-e-nazar be-kār hai

manzar-e-hastī purānā ho chukā

hamdamo lutf-e-shabana ho chuka

aish-o-ishrat ka zamana ho chuka

ab gham-o-shadi se aazadi mili

ranj-o-rahat ka zamana ho chuka

najd mein aawara kyon phirta hai qais

mahmil-e-laila rawana ho chuka

manzil-e-dil mein thin kya kya hasraten

qafila ye bhi rawana ho chuka

zindagi gham ki kahani rah gai

aish ka rangin fasana ho chuka

ho gai viran wo bazm-e-mai-kada

daur-e-saghar ka zamana ho chuka

ab nahin bazm-e-chaman rangin-nawa

andalibon ka tarana ho chuka

mutrib-e-ayyam ne badla hai ThaTh

shauq ka chang-o-chaghana ho chuka

mauj-e-muztar ko hua aaKHir qarar

shor-e-tufan ka zamana ho chuka

'nazir' ab zauq-e-nazar be-kar hai

manzar-e-hasti purana ho chuka