hamein banate hue KHud bigaD gaya hai KHuda

hameñ banāte hue ḳhud bigaḌ gayā hai ḳhudā

'ajīb logoñ kī sohbat meñ paḌ gayā hai ḳhudā

chalī vo shiddat-e-īmān kī havā-e-ḳhizāñ

hamārī shāḳh-e-'aqīdat se jhaḌ gayā hai ḳhudā

rafū kare bhī mohabbat to kis jagah āḳhir

ki sar se paañv talak hī udhaḌ gayā hai ḳhudā

yahāñ zamīn se ham bhī ukhaḌ ke rah ga.e haiñ

vahāñ jo apne falak par ujaḌ gayā hai ḳhudā

ġhazal nahīñ hai ye hai bandagī kī qabr 'ehsās'

so ḳhāk-e-bandagī meñ aa ke gaḌ gayā hai ḳhudā

hamein banate hue KHud bigaD gaya hai KHuda

'ajib logon ki sohbat mein paD gaya hai KHuda

chali wo shiddat-e-iman ki hawa-e-KHizan

hamari shaKH-e-'aqidat se jhaD gaya hai KHuda

rafu kare bhi mohabbat to kis jagah aaKHir

ki sar se panw talak hi udhaD gaya hai KHuda

yahan zamin se hum bhi ukhaD ke rah gae hain

wahan jo apne falak par ujaD gaya hai KHuda

ghazal nahin hai ye hai bandagi ki qabr 'ehsas'

so KHak-e-bandagi mein aa ke gaD gaya hai KHuda