hamein dekha na kar uDti nazar se

hameñ dekhā na kar uḌtī nazar se

umīdoñ ke nikal aate haiñ par se

ab un kī raakh palkoñ par jamī hai

ghaḌī bhar ḳhvāb chamke the sharar se

bachāne meñ lagī hai ḳhalq mujh ko

maiñ zaa.e.a ho rahā huuñ is hunar se

vo lahja-hā-e-dariyā-e-suḳhan meñ

musalsal bante rahte haiñ bhañvar se

samundar hai koī āñkhoñ meñ shāyad

kināroñ par chamakte haiñ guhar se

tavaqqo hai unheñ us abr se jo

dikhā.ī de idhar us or barse

zarā imkān kyā dekhā namī kā

nikal aa.e shajar dīvār-o-dar se

raqam dil par huā kyā kyā na pūchho

bayāñ honā hai ye qissa nazar se

sambhalte hī nahīñ ham se 'bakul' ab

bache haiñ din yahāñ jo muḳhtasar se

hamein dekha na kar uDti nazar se

umidon ke nikal aate hain par se

ab un ki rakh palkon par jami hai

ghaDi bhar KHwab chamke the sharar se

bachane mein lagi hai KHalq mujh ko

main zaea ho raha hun is hunar se

wo lahja-ha-e-dariya-e-suKHan mein

musalsal bante rahte hain bhanwar se

samundar hai koi aankhon mein shayad

kinaron par chamakte hain guhar se

tawaqqo hai unhen us abr se jo

dikhai de idhar us or barse

zara imkan kya dekha nami ka

nikal aae shajar diwar-o-dar se

raqam dil par hua kya kya na puchho

bayan hona hai ye qissa nazar se

sambhalte hi nahin hum se 'bakul' ab

bache hain din yahan jo muKHtasar se