hamein kuchh gardish-e-ayyam se shikwa nahin hai

hameñ kuchh gardish-e-ayyām se shikvā nahīñ hai

magar ye bhī haqīqat hai ki jī achchhā nahīñ hai

bhalā kis ko dikhā.eñ jā ke dil ke aable ham

sabhī jaldī meñ haiñ koī zarā ruktā nahīñ hai

sabhī ne talḳhiyoñ kī gard is chehre pe mal dī

aur us par ye shikāyat bhī ki ab hañstā nahīñ hai

na pariyāñ haiñ na shahzāda na lambī niiñd is meñ

hamārī āp-bītī hai koī qissa nahīñ hai

'abas shahr-e-bayābāñ meñ ye bāteñ chheḌ baiThe

yahāñ dil kī kahānī ab koī suntā nahīñ hai

bahut hī jān-levā hai ye hastī kā mu'amma

nikal jaane kā bhī lekin koī rasta nahīñ hai

sunā karte the ro ro kar guzar jaatī haiñ rāteñ

magar is raat kā koī sirā dikhtā nahīñ hai

hamein kuchh gardish-e-ayyam se shikwa nahin hai

magar ye bhi haqiqat hai ki ji achchha nahin hai

bhala kis ko dikhaen ja ke dil ke aable hum

sabhi jaldi mein hain koi zara rukta nahin hai

sabhi ne talKHiyon ki gard is chehre pe mal di

aur us par ye shikayat bhi ki ab hansta nahin hai

na pariyan hain na shahzada na lambi nind is mein

hamari aap-biti hai koi qissa nahin hai

'abas shahr-e-bayaban mein ye baaten chheD baiThe

yahan dil ki kahani ab koi sunta nahin hai

bahut hi jaan-lewa hai ye hasti ka mu'amma

nikal jaane ka bhi lekin koi rasta nahin hai

suna karte the ro ro kar guzar jati hain raaten

magar is raat ka koi sira dikhta nahin hai