hamein mahfil mein aankhon par biThaenge bhala wo kyun

hameñ mahfil meñ āñkhoñ par biThā.eñge bhalā vo kyuuñ

ki rasm-e-dostī ham se nibhā.eñge bhalā vo kyuuñ

kiyā maḳhsūs hai ahbāb kā halqa unhoñne ab

yuuñ hāl-e-dil hameñ phir se sunā.eñge bhalā vo kyuuñ

kabhī the vo hamāre rāzdāñ jaañ bhī luTāte the

hamāre raaz saare ab chhupā.eñge bhalā vo kyuuñ

jo jiite jī hameñ zindāñ meñ dafnā kar yuuñ jaate haiñ

hamārī maut par aañsū bahā.enge bhalā vo kyuuñ

hameñ rusvā kiyā thā shahr se us ne nikālā thā

mohabbat se 'mahak' vāpas bulā.eñge bhalā vo kyuuñ

hamein mahfil mein aankhon par biThaenge bhala wo kyun

ki rasm-e-dosti hum se nibhaenge bhala wo kyun

kiya maKHsus hai ahbab ka halqa unhonne ab

yun haal-e-dil hamein phir se sunaenge bhala wo kyun

kabhi the wo hamare raazdan jaan bhi luTate the

hamare raaz sare ab chhupaenge bhala wo kyun

jo jite ji hamein zindan mein dafna kar yun jate hain

hamari maut par aansu bahaenge bhala wo kyun

hamein ruswa kiya tha shahr se us ne nikala tha

mohabbat se 'mahak' wapas bulaenge bhala wo kyun