hamein pine-pilane ka maza ab tak nahin aaya

hameñ pīne-pilāne kā mazā ab tak nahīñ aayā

ki bazm-e-mai meñ koī pārsā ab tak nahīñ aayā

sitam bhī lutf ho jaatā hai bhole-pan kī bātoñ se

tujhe ai jaan andāz-e-jafā ab tak nahīñ aayā

dam-e-āḳhir the bālīñ pe jo aane ko vo aa.e bhī

to hañs kar kah ga.e vaqt-e-duā ab tak nahīñ aayā

sahar hote bujhā.e kaun ai sham-e-lahad tujh ko

koī jhoñkā nasīm-e-sub.h kā ab tak nahīñ aayā

ḳhudā jaane huā kyā kūcha-e-jānāñ meñ dil jā kar

mirā bhūlā huā bhaTkā huā ab tak nahīñ aayā

gayā thā kah ke ye qāsid ki ulTe paañv aatā huuñ

kahāñ kambaḳht jā kar mar rahā ab tak nahīñ aayā

jise tum koste ho umr us kī aur baḌhtī hai

tumheñ sab kuchh to aayā kosnā ab tak nahīñ aayā

sitam karnā daġhā karnā ki va.ade kā vafā karnā

batāo kyā tumheñ aayā hai kyā ab tak nahīñ aayā

kisī ne koī dushman meñ chhupā Daalā miTā Daalā

galī to aa.ī un kā naqsh-e-pā ab tak nahīñ aayā

ye kyā insāf hai sayyād chhoḌe qaid se mujh ko

ki aisā koī murġh-e-ḳhush-navā ab tak nahīñ aayā

batā deñ aa gayā kyā tum ko is uThtī javānī meñ

batā deñ kaan meñ chupke se kyā ab tak nahīñ aayā

butān-e-nāznīñ jab dekhte haiñ mujh se kahte haiñ

tumhārī jaan par qahr-e-ḳhudā ab tak nahīñ aayā

kiyā hasrat se ruḳhsat sub.h ke tāroñ ko ye kah

ki jis kā shaam se thā aasrā ab tak nahīñ aayā

ye ġhaflat hai ki mahshar meñ bhī āñkheñ band haiñ merī

samajhtā huuñ yahī roz-e-jazā ab tak nahīñ aayā

na phūTī koī kopal tak mirī shāḳh-e-nasheman meñ

ḳhizāñ ke ba.ad mausam dūsrā ab tak nahīñ aayā

diyā ho to diyā ho kuchh payām-e-shauq āñkhoñ ne

mire lab par to harf-e-mudda.ā ab tak nahīñ aayā

is ubhre ubhre joban par yūñhī vo baiThe rah jaate

unheñ uThtī javānī kā mazā ab tak nahīñ aayā

vo din aa.e mire sarkār ahl-e-bazm se pūchheñ

kahāñ hai kyuuñ 'riyāz'-e-ḳhush-navā ab tak nahīñ aayā

hamein pine-pilane ka maza ab tak nahin aaya

ki bazm-e-mai mein koi parsa ab tak nahin aaya

sitam bhi lutf ho jata hai bhole-pan ki baaton se

tujhe ai jaan andaz-e-jafa ab tak nahin aaya

dam-e-aKHir the baalin pe jo aane ko wo aae bhi

to hans kar kah gae waqt-e-dua ab tak nahin aaya

sahar hote bujhae kaun ai sham-e-lahad tujh ko

koi jhonka nasim-e-subh ka ab tak nahin aaya

KHuda jaane hua kya kucha-e-jaanan mein dil ja kar

mera bhula hua bhaTka hua ab tak nahin aaya

gaya tha kah ke ye qasid ki ulTe panw aata hun

kahan kambaKHt ja kar mar raha ab tak nahin aaya

jise tum koste ho umr us ki aur baDhti hai

tumhein sab kuchh to aaya kosna ab tak nahin aaya

sitam karna dagha karna ki wade ka wafa karna

batao kya tumhein aaya hai kya ab tak nahin aaya

kisi ne koi dushman mein chhupa Dala miTa Dala

gali to aai un ka naqsh-e-pa ab tak nahin aaya

ye kya insaf hai sayyaad chhoDe qaid se mujh ko

ki aisa koi murgh-e-KHush-nawa ab tak nahin aaya

bata den aa gaya kya tum ko is uThti jawani mein

bata den kan mein chupke se kya ab tak nahin aaya

butan-e-naznin jab dekhte hain mujh se kahte hain

tumhaari jaan par qahr-e-KHuda ab tak nahin aaya

kiya hasrat se ruKHsat subh ke taron ko ye kah

ki jis ka sham se tha aasra ab tak nahin aaya

ye ghaflat hai ki mahshar mein bhi aankhen band hain meri

samajhta hun yahi roz-e-jaza ab tak nahin aaya

na phuTi koi kopal tak meri shaKH-e-nasheman mein

KHizan ke baad mausam dusra ab tak nahin aaya

diya ho to diya ho kuchh payam-e-shauq aankhon ne

mere lab par to harf-e-muddaa ab tak nahin aaya

is ubhre ubhre joban par yunhi wo baiThe rah jate

unhen uThti jawani ka maza ab tak nahin aaya

wo din aae mere sarkar ahl-e-bazm se puchhen

kahan hai kyun 'riyaz'-e-KHush-nawa ab tak nahin aaya