hamein safina-e-hasti ka rahnuma na mila

hameñ safīna-e-hastī kā rahnumā na milā

ḳhudā ko saath liyā koī nāḳhudā na milā

sukūn-e-qalb milā be-niyāziyāñ pā.īñ

uThā.e haath jo terī taraf to kyā na milā

kisī kī shirkat-e-aġhyār kab gavārā thī

ḳhudā kā shukr koī dard-āshnā na milā

taḌap taḌap ke tire bismiloñ ne maqtal meñ

baḌhā.e haath magar dāman-e-qazā na milā

milī thī aañkh to phir tāb-e-dīd bhī miltī

tajalliyoñ ke tamāsha meñ kuchh mazā na milā

thā iztirāb meñ vo lutf-e-zindagī muzmar

phir us ke baad kisī baat meñ mazā na milā

tumhārī shoḳhī-e-taqrīr kā to kyā kahnā

javāb saaf kabhī merī baat kā na milā

nigāh sharm se nīchī rahī pashemāñ kī

vo be-vafā jo milā bhī to be-vafā na milā

sharīk-e-hāl ab ahbāb tak nahīñ hote

'shamīm' ham ko bhī qismat se kyā zamāna milā

hamein safina-e-hasti ka rahnuma na mila

KHuda ko sath liya koi naKHuda na mila

sukun-e-qalb mila be-niyaziyan pain

uThae hath jo teri taraf to kya na mila

kisi ki shirkat-e-aghyar kab gawara thi

KHuda ka shukr koi dard-ashna na mila

taDap taDap ke tere bismilon ne maqtal mein

baDhae hath magar daman-e-qaza na mila

mili thi aankh to phir tab-e-did bhi milti

tajalliyon ke tamasha mein kuchh maza na mila

tha iztirab mein wo lutf-e-zindagi muzmar

phir us ke baad kisi baat mein maza na mila

tumhaari shoKHi-e-taqrir ka to kya kahna

jawab saf kabhi meri baat ka na mila

nigah sharm se nichi rahi pasheman ki

wo be-wafa jo mila bhi to be-wafa na mila

sharik-e-haal ab ahbab tak nahin hote

'shamim' hum ko bhi qismat se kya zamana mila