hamein yaqin tha ki hum doston mein rahte hain

hameñ yaqīñ thā ki ham dostoñ meñ rahte haiñ

jo ghar jalā to lagā dushmanoñ meñ rahte haiñ

ham ik kiran haiñ magar bādaloñ meñ rahte haiñ

bichhaḌ ke tum se baḌī uljhanoñ meñ rahte haiñ

hamāre jiine kī ab ye misāl hai jaise

kaTe piTe hue jumle ḳhatoñ meñ rahte haiñ

inhī sī choT bhī lagtī hai sar-bulandoñ ko

jo pattharoñ kī tarah Thokaroñ meñ rahte haiñ

jo chehre chāñd se lagte haiñ mahfiloñ meñ hameñ

vo sham’-e-kushta kī sūrat gharoñ meñ rahte haiñ

kuchh aise phuul haiñ jin ko milā nahīñ māhaul

mahak rahe haiñ magar jangaloñ meñ rahte haiñ

vatan kī ḳhair manāo ki dushmanān-e-vatan

sahar se shaam talak sāzishoñ meñ rahte haiñ

hamāre shahr meñ insān ab nahīñ rahte

ham apne shahr kī parchhā.iyoñ meñ rahte haiñ

unhīñ ko mere ġhamoñ kī ḳhabar nahīñ hai 'bashīr'

jo ruuh ban ke mirī dhaḌkanoñ meñ rahte haiñ

hamein yaqin tha ki hum doston mein rahte hain

jo ghar jala to laga dushmanon mein rahte hain

hum ek kiran hain magar baadalon mein rahte hain

bichhaD ke tum se baDi uljhanon mein rahte hain

hamare jine ki ab ye misal hai jaise

kaTe piTe hue jumle KHaton mein rahte hain

inhi si choT bhi lagti hai sar-bulandon ko

jo pattharon ki tarah Thokaron mein rahte hain

jo chehre chand se lagte hain mahfilon mein hamein

wo sham’-e-kushta ki surat gharon mein rahte hain

kuchh aise phul hain jin ko mila nahin mahaul

mahak rahe hain magar jangalon mein rahte hain

watan ki KHair manao ki dushmanan-e-watan

sahar se sham talak sazishon mein rahte hain

hamare shahr mein insan ab nahin rahte

hum apne shahr ki parchhaiyon mein rahte hain

unhin ko mere ghamon ki KHabar nahin hai 'bashir'

jo ruh ban ke meri dhaDkanon mein rahte hain