hamein ye raaz sabhi ko batana hota hai

hameñ ye raaz sabhī ko batānā hotā hai

na.e ke baa'd hī koī purānā hotā hai

bilā-javāz nahīñ boltā huuñ der talak

ki maiñ ne baat ko aage baḌhānā hotā hai

yūñhī nahīñ mirī āñkhoñ meñ ashk lahrāte

ki har kisī ne mirā dil dukhānā hotā hai

ye munsifīn kisī ko bhī haq nahīñ dete

ḳhudā kā faisla hī munsifāna hotā hai

ye dasht vaale miyāñ hijr gungunāte haiñ

har ek ḳhitte kā qaumī tarāna hotā hai

kisī ko de dī hai tohfe meñ yūsufī kī kitāb

ki ham ne kaunsā ab muskurānā hotā hai

hamārī baat vagarna koī nahīñ suntā

lihāzā shor to ham ne machānā hotā hai

hamein ye raaz sabhi ko batana hota hai

nae ke ba'd hi koi purana hota hai

bila-jawaz nahin bolta hun der talak

ki main ne baat ko aage baDhana hota hai

yunhi nahin meri aankhon mein ashk lahraate

ki har kisi ne mera dil dukhana hota hai

ye munsifin kisi ko bhi haq nahin dete

KHuda ka faisla hi munsifana hota hai

ye dasht wale miyan hijr gungunate hain

har ek KHitte ka qaumi tarana hota hai

kisi ko de di hai tohfe mein yusufi ki kitab

ki hum ne kaunsa ab muskurana hota hai

hamari baat wagarna koi nahin sunta

lihaza shor to hum ne machana hota hai