hamin hain jo teri ek ik ada ko jaan lete hain

hamīñ haiñ jo tirī ik ik adā ko jaan lete haiñ

ġham-e-duniyā tujhe har rang meñ pahchān lete haiñ

kabhī ahl-e-ḳhirad se mashvara lene nahīñ jaate

junūn-e-shauq kī har baat lekin maan lete haiñ

tire bhīge hue bāloñ ko ham ne chhū ke dekhā hai

vo ḳhushbū hai ki fasl-e-gul kī aahaT jaan lete haiñ

vahī insāf ke qātil nazar aa.e zamāne meñ

jo apne haath meñ insāf kī mīzān lete haiñ

ġhazal to zindagī kī dhaḌkanoñ kā naam hai 'shabnam'

ġhazab karte haiñ jo lafzoñ kī chādar taan lete haiñ

hamin hain jo teri ek ek ada ko jaan lete hain

gham-e-duniya tujhe har rang mein pahchan lete hain

kabhi ahl-e-KHirad se mashwara lene nahin jate

junun-e-shauq ki har baat lekin man lete hain

tere bhige hue baalon ko hum ne chhu ke dekha hai

wo KHushbu hai ki fasl-e-gul ki aahaT jaan lete hain

wahi insaf ke qatil nazar aae zamane mein

jo apne hath mein insaf ki mizan lete hain

ghazal to zindagi ki dhaDkanon ka nam hai 'shabnam'

ghazab karte hain jo lafzon ki chadar tan lete hain