hamrah uske subh chale sham bhi chale

hamrāh us ke sub.h chale shaam bhī chale

par le ke koī amn kā paiġhām bhī chale

ab kyā ilāj-e-dard-e-dil-e-be-talab karūñ

kuchh ho to un se nāma-o-paiġhām bhī chale

ai dil nikāl aisī koī raah ishq meñ

tū bhī rahe sukūñ se mirā kaam bhī chale

guzre nahīñ haiñ sirf chaman hī se ai bahār

ham dekhte hue tirā anjām bhī chale

duniyā-e-be-sabāt kī chāhat to dekhiye

har shaḳhs chāhtā hai mirā naam bhī chale

ham ne kiyā hai aaj 'ḳhalish' azm-e-mai-kada

kah do ki saath gardish-e-ayyām bhī chale

hamrah us ke subh chale sham bhi chale

par le ke koi amn ka paigham bhi chale

ab kya ilaj-e-dard-e-dil-e-be-talab karun

kuchh ho to un se nama-o-paigham bhi chale

ai dil nikal aisi koi rah ishq mein

tu bhi rahe sukun se mera kaam bhi chale

guzre nahin hain sirf chaman hi se ai bahaar

hum dekhte hue tera anjam bhi chale

duniya-e-be-sabaat ki chahat to dekhiye

har shaKHs chahta hai mera nam bhi chale

hum ne kiya hai aaj 'KHalish' azm-e-mai-kada

kah do ki sath gardish-e-ayyam bhi chale