hangama-KHez dawa-e-mansur ho gaya

hangāma-ḳhez da.avā-e-mansūr ho gayā

lab ham-navā-e-ḳhātir-e-maġhrūr ho gayā

bazm-e-ḳhayāl-e-yār meñ hai mahv-e-ārzū

mujh se mirā ḳhayāl bahut duur ho gayā

miTnā thā kab tarāvish-e-zaḳhm-e-jigar kā rang

haañ riste riste zaḳhm se nāsūr ho gayā

thā jalva-gāh-e-yār mirā dāman-e-nigāh

jis zarre par nigāh paḌī tuur ho gayā

bas ai sukūn-e-yās ziyāda sitam na kar

vo iztirāb-e-shauq to kāfūr ho gayā

nākāmī-e-azal kī sitam-rāniyāñ na pūchh

maiñ apne iḳhtiyār se majbūr ho gayā

uf iztirāb-e-shauq kī hasrat-faroshiyāñ

husn-e-hayā-parast bhī majbūr ho gayā

maiñ aur ye sarnavisht-e-malāmat kī jā nahīñ

maiñ us ke intiḳhāb se majbūr ho gayā

hangāma-hā-e-ġhalġhala-e-mā-o-man na pūchh

'beḳhud' bhī apne ahd kā mansūr ho gayā

hangama-KHez dawa-e-mansur ho gaya

lab ham-nawa-e-KHatir-e-maghrur ho gaya

bazm-e-KHayal-e-yar mein hai mahw-e-arzu

mujh se mera KHayal bahut dur ho gaya

miTna tha kab tarawish-e-zaKHm-e-jigar ka rang

han riste riste zaKHm se nasur ho gaya

tha jalwa-gah-e-yar mera daman-e-nigah

jis zarre par nigah paDi tur ho gaya

bas ai sukun-e-yas ziyaada sitam na kar

wo iztirab-e-shauq to kafur ho gaya

nakaami-e-azal ki sitam-raniyan na puchh

main apne iKHtiyar se majbur ho gaya

uf iztirab-e-shauq ki hasrat-faroshiyan

husn-e-haya-parast bhi majbur ho gaya

main aur ye sarnawisht-e-malamat ki ja nahin

main us ke intiKHab se majbur ho gaya

hangama-ha-e-ghalghala-e-ma-o-man na puchh

'beKHud' bhi apne ahd ka mansur ho gaya