hangama shahr-e-jaan mein musalsal lahu se hai

hañgāma shahr-e-jāñ meñ musalsal lahū se hai

ehsās meñ hai jitnī bhī halchal lahū se hai

shādābiyāñ usī kī badaulat haiñ ruuh meñ

hai regzār-e-jism jo jal-thal lahū se hai

sābit huā ki detā hai tū ye bhī aag sī

sābit huā ye soz-e-musalsal lahū se hai

ḳhāke sabhī adhūre haiñ sab naqsh nā-tamām

duniyā meñ jo bhī kuchh hai mukammal lahū se hai

qaa.em hai us se āriz-e-gulgūñ kī dilkashī

rañgīñ ruḳh-e-hayāt kā āñchal lahū se hai

dānishvarī lahū se milī ek shaḳhs ko

ik aur shaḳhs hai ki jo pāgal lahū se hai

'rāhī' vagarna zehn hai tārīkiyoñ kā ghar

raushan ḳhayāl-o-fikr kī mash.al lahū se hai

hangama shahr-e-jaan mein musalsal lahu se hai

ehsas mein hai jitni bhi halchal lahu se hai

shadabiyan usi ki badaulat hain ruh mein

hai regzar-e-jism jo jal-thal lahu se hai

sabit hua ki deta hai tu ye bhi aag si

sabit hua ye soz-e-musalsal lahu se hai

KHake sabhi adhure hain sab naqsh na-tamam

duniya mein jo bhi kuchh hai mukammal lahu se hai

qaem hai us se aariz-e-gulgun ki dilkashi

rangin ruKH-e-hayat ka aanchal lahu se hai

danishwari lahu se mili ek shaKHs ko

ek aur shaKHs hai ki jo pagal lahu se hai

'rahi' wagarna zehn hai tarikiyon ka ghar

raushan KHayal-o-fikr ki mashal lahu se hai