hansi aati hai kahta tha ki aisa ho nahin sakta

hañsī aatī hai kahtā thā ki aisā ho nahīñ saktā

ye merā dil hai merā dil kisī kā ho nahīñ saktā

ġhamoñ ke āsmāñ par jagmagātī ḳhushnumā yādeñ

ki shahr-e-dil kī rātoñ kā saverā ho nahīñ saktā

ajab andāz meñ us ne kahā aur muuñd liiñ āñkheñ

vo mujh se pher le nazreñ are jā ho nahīñ saktā

ġhamoñ par muskurāhaT kā labāda oḌh rakkhā hai

kahīñ is shaan kā duujā mukhauTā ho nahīñ saktā

jahāñ tahzīb ḳhud andhī galī meñ rāsta bhaTke

vahāñ kirdār-o-sīrat kā ujālā ho nahīñ saktā

koī marne se roke hai koī jiine nahīñ detā

sivā mar mar ke jiine ke guzārā ho nahīñ saktā

hansi aati hai kahta tha ki aisa ho nahin sakta

ye mera dil hai mera dil kisi ka ho nahin sakta

ghamon ke aasman par jagmagati KHushnuma yaaden

ki shahr-e-dil ki raaton ka sawera ho nahin sakta

ajab andaz mein us ne kaha aur mund lin aankhen

wo mujh se pher le nazren are ja ho nahin sakta

ghamon par muskurahaT ka labaada oDh rakkha hai

kahin is shan ka duja mukhauTa ho nahin sakta

jahan tahzib KHud andhi gali mein rasta bhaTke

wahan kirdar-o-sirat ka ujala ho nahin sakta

koi marne se roke hai koi jine nahin deta

siwa mar mar ke jine ke guzara ho nahin sakta