hansi ki aankh mein phaila nami ka rang dekha hai

hañsī kī aañkh meñ phailā namī kā rang dekhā hai

añdheroñ meñ lipaTtā raushnī kā rang dekhā hai

sadā pahlū meñ bhī madd-e-muqābil kī tarah rahnā

kisī kī dostī meñ dushmanī kā rang dekhā hai

baḌī gahrī mohabbat kī dhanak hai jin nigāhoñ meñ

unhī meñ gaahe gaahe dil-lagī kā rang dekhā hai

kitāboñ se nikaltā hai to pahchānā nahīñ jaatā

vagarna sāmne aksar ḳhushī kā rang dekhā hai

churā kar le na jaa.e fāsloñ kī dhuup bhī jis ko

kisī par is qadar gahrā kisī kā rang dekhā hai

ye dekhā hai ki gumrāhī nishāñ bantī hai manzil kā

taġhāful kī Dagar meñ āgahī kā rang dekhā hai

shikasta soḳhta-jāñ bhī tamannā-e-bahārāñ bhī

daraḳhtoñ par ḳhizāñ meñ aadmī kā rang dekhā hai

lage jo dhuup uḌ jaa.e mile bārish to bah jaa.e

sabhī rañgoñ se kachchā zindagī kā rang dekhā hai

na jaane us pe utregā kabhī Thahrāv kā mausam

har ik lahza badaltā oḌhnī kā rang dekhā hai

hansi ki aankh mein phaila nami ka rang dekha hai

andheron mein lipaTta raushni ka rang dekha hai

sada pahlu mein bhi madd-e-muqabil ki tarah rahna

kisi ki dosti mein dushmani ka rang dekha hai

baDi gahri mohabbat ki dhanak hai jin nigahon mein

unhi mein gahe gahe dil-lagi ka rang dekha hai

kitabon se nikalta hai to pahchana nahin jata

wagarna samne aksar KHushi ka rang dekha hai

chura kar le na jae faslon ki dhup bhi jis ko

kisi par is qadar gahra kisi ka rang dekha hai

ye dekha hai ki gumrahi nishan banti hai manzil ka

taghaful ki Dagar mein aagahi ka rang dekha hai

shikasta soKHta-jaan bhi tamanna-e-bahaaran bhi

daraKHton par KHizan mein aadmi ka rang dekha hai

lage jo dhup uD jae mile barish to bah jae

sabhi rangon se kachcha zindagi ka rang dekha hai

na jaane us pe utrega kabhi Thahraw ka mausam

har ek lahza badalta oDhni ka rang dekha hai