hansi mein wo baat maine kah di ki rah gae aap dang ho kar

hañsī meñ vo baat maiñ ne kah dī ki rah ga.e aap dañg ho kar

chhupā huā thā jo raaz dil meñ khulā vo chehre kā rañg ho kar

hamesha kuuch o maqām apnā rahā hai ḳhizr-e-rah-e-tarīqat

rukā to maiñ sañg-e-mīl ban kar chalā to āvāz-e-chañg ho kar

na toḌte aarsī agar tum to itne yūsuf nazar na aate

ye qāfila khīñch laa.ī saarā shikast-e-ā.īna zañg ho kar

shabāb o piirī kā aanā jaanā ġhazab kā pur-dard hai fasāna

ye rah ga.ī ban ke gard-e-hasrat vo uḌ gayā ruḳh se rañg ho kar

jo raaz dil se zabāñ tak aayā to us ko qaabū meñ phir na paayā

zabāñ se niklā kalām ban kar kamāñ se chhūTā ḳhadañg ho kar

ġhazab hai bahr-e-fanā kā dhārā ki mujh ko uljhā ke maarā maarā

nafas ne maujoñ kā jaal bun kar lahad ne kām-e-nahañg ho kar

milā dil-e-nā-hifāz mujh ko to kyā kisī kā lihāz mujh ko

kahīñ garebāñ na phaaḌ Dāleñ janāb-e-nāseh bhī tañg ho kar

jo ab kī mīnā-e-mai ko toḌā chalegī talvār mohtasib se

lahū bhī rindoñ kā dekh lenā bahā mai-e-lāla-rañg ho kar

na zabt se shikva lab tak aayā na sabr ne aah khīñchne dī

rahā dahan meñ vo qufl ban kar girāyā chhātī pe sañg ho kar

samajh le suufī agar ye nukta hai ek bazm-e-samā-e-hastī

to nau-piyāle ye āsmāñ ke bajeñ abhī jal-tarañg ho kar

bhalā ho afsurda-ḳhātirī kā ki hasratoñ ko dabā ke rakkhā

bachā liyā harzagī se us ne lihāz-e-nāmūs-o-nañg ho kar

jigar-ḳharāshī se paa.ī fursat na sīna-kāvī se nāḳhunoñ ne

galā garebāñ ne ghūñT Daalā junūñ kī shorish se tañg ho kar

badal ke duniyā ne bhes sad.hā ise Darāyā use lubhāyā

kabhī zan-e-pīr-zāl ban kar kabhī but-e-shoḳh-o-shañg ho kar

uThe the talvār khīñch kar tum to phir ta.ammul na chāhiye thā

ki rah ga.ī mere dil kī hasrat shahīd-e-teġh-e-darañg ho kar

jo valvale the vo dab ga.e sab hujūm-e-lait-o-la.al meñ 'haidar'

jo hausle the vo dil hī dil meñ rahe dareġh-o-darañg ho kar

hansi mein wo baat main ne kah di ki rah gae aap dang ho kar

chhupa hua tha jo raaz dil mein khula wo chehre ka rang ho kar

hamesha kuch o maqam apna raha hai KHizr-e-rah-e-tariqat

ruka to main sang-e-mil ban kar chala to aawaz-e-chang ho kar

na toDte aarsi agar tum to itne yusuf nazar na aate

ye qafila khinch lai sara shikast-e-aina zang ho kar

shabab o piri ka aana jaana ghazab ka pur-dard hai fasana

ye rah gai ban ke gard-e-hasrat wo uD gaya ruKH se rang ho kar

jo raaz dil se zaban tak aaya to us ko qabu mein phir na paya

zaban se nikla kalam ban kar kaman se chhuTa KHadang ho kar

ghazab hai bahr-e-fana ka dhaara ki mujh ko uljha ke mara mara

nafas ne maujon ka jal bun kar lahad ne kaam-e-nahang ho kar

mila dil-e-na-hifaz mujh ko to kya kisi ka lihaz mujh ko

kahin gareban na phaD Dalen janab-e-naseh bhi tang ho kar

jo ab ki mina-e-mai ko toDa chalegi talwar mohtasib se

lahu bhi rindon ka dekh lena baha mai-e-lala-rang ho kar

na zabt se shikwa lab tak aaya na sabr ne aah khinchne di

raha dahan mein wo qufl ban kar giraya chhati pe sang ho kar

samajh le sufi agar ye nukta hai ek bazm-e-sama-e-hasti

to nau-piyale ye aasman ke bajen abhi jal-tarang ho kar

bhala ho afsurda-KHatiri ka ki hasraton ko daba ke rakkha

bacha liya harzagi se us ne lihaz-e-namus-o-nang ho kar

jigar-KHarashi se pai fursat na sina-kawi se naKHunon ne

gala gareban ne ghunT Dala junun ki shorish se tang ho kar

badal ke duniya ne bhes sadha ise Daraya use lubhaya

kabhi zan-e-pir-zal ban kar kabhi but-e-shoKH-o-shang ho kar

uThe the talwar khinch kar tum to phir tammul na chahiye tha

ki rah gai mere dil ki hasrat shahid-e-tegh-e-darang ho kar

jo walwale the wo dab gae sab hujum-e-lait-o-lal mein 'haidar'

jo hausle the wo dil hi dil mein rahe daregh-o-darang ho kar