haq baat pe marta hun to marne nahin dete

haq baat pe martā huuñ to marne nahīñ dete

ye ahl-e-jahāñ kuchh bhī to karne nahīñ dete

us paar kī bāteñ to bahut karte haiñ lekin

kashtī koī is paar utarne nahīñ dete

har jurm mire naam kiye jaate haiñ lekin

ḳhud par koī ilzām vo dharne nahīñ dete

hai fikr unheñ mar ke bhī maiñ zinda rahūñgā

ye soch ke zālim mujhe marne nahīñ dete

is dahr ke maqtal meñ bapā zulm hai aisā

mazlūm ko fariyād bhī karne nahīñ dete

manzil hai kaḌī aisī kaḌī bhī to nahīñ hai

vo rāh-numā haiñ ki guzarne nahīñ dete

'rājas' unheñ da.avā hai bahut chāragarī kā

riste hue zaḳhmoñ ko jo bharne nahīñ dete

haq baat pe marta hun to marne nahin dete

ye ahl-e-jahan kuchh bhi to karne nahin dete

us par ki baaten to bahut karte hain lekin

kashti koi is par utarne nahin dete

har jurm mere nam kiye jate hain lekin

KHud par koi ilzam wo dharne nahin dete

hai fikr unhen mar ke bhi main zinda rahunga

ye soch ke zalim mujhe marne nahin dete

is dahr ke maqtal mein bapa zulm hai aisa

mazlum ko fariyaad bhi karne nahin dete

manzil hai kaDi aisi kaDi bhi to nahin hai

wo rah-numa hain ki guzarne nahin dete

'rajas' unhen dawa hai bahut chaaragari ka

riste hue zaKHmon ko jo bharne nahin dete