haq ko ham ne to sadā phūlte phalte dekhā
tez āñdhī meñ bhī is sham.a ko jalte dekhā
jin kī aqlīm meñ hotī hī na thī shaam kabhī
āftāb un kī hukūmat kā bhī Dhalte dekhā
ek parbat kī chaḌhā.ī hai ye ahd-e-hastī
jo chaḌhā dauḌ ke us ko hī phisalte dekhā
jin pe chhāyā thā ra.ūnat kā nasha be-pāyāñ
Thokareñ khā ke bhī un ko na sañbhalte dekhā
raunaq-e-bazm to kyā lā.eq-e-mahfil bhī nahīñ
ham ne apnā koī armāñ na nikalte dekhā
kaun hai vo jise ab saa.e se bhī nafrat hai
ham ne jab dekhā use dhuup meñ chalte dekhā
vaqt kī baat hai vo qāfila-sālār haiñ aaj
giḌgiḌāte jinheñ dekhā hai machalte dekhā
kabhī aa.iin kī tauhīn gavārā kar lī
kabhī insāf kā sar ham ne kuchalte dekhā
ek jaan aur do qālib the 'musavvir' jo kabhī
aisā vaqt aaya ki un ko bhī badalte dekhā
haq ko hum ne to sada phulte phalte dekha
tez aandhi mein bhi is shama ko jalte dekha
jin ki aqlim mein hoti hi na thi sham kabhi
aaftab un ki hukumat ka bhi Dhalte dekha
ek parbat ki chaDhai hai ye ahd-e-hasti
jo chaDha dauD ke us ko hi phisalte dekha
jin pe chhaya tha raunat ka nasha be-payan
Thokaren kha ke bhi un ko na sanbhalte dekha
raunaq-e-bazm to kya laeq-e-mahfil bhi nahin
hum ne apna koi arman na nikalte dekha
kaun hai wo jise ab sae se bhi nafrat hai
hum ne jab dekha use dhup mein chalte dekha
waqt ki baat hai wo qafila-salar hain aaj
giDgiDate jinhen dekha hai machalte dekha
kabhi aain ki tauhin gawara kar li
kabhi insaf ka sar hum ne kuchalte dekha
ek jaan aur do qalib the 'musawwir' jo kabhi
aisa waqt aaya ki un ko bhi badalte dekha
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.