haq pasandon se jahan bar-sar-e-paikar sahi

haq pasandoñ se jahāñ bar-sar-e-paikār sahī

kuchh dinoñ aur bhī rusvā sar-e-bāzār sahī

ḳhūn-e-ma.asūm se ta.amīr hai bustān-e-vajūd

ishrat-e-dahr se mahrūm vafādār sahī

jehd-o-īsār se raushan hai vafā kī qindīl

dil-girafta haram-e-pāk kā me.amār sahī

merā īmān hai elān-e-haqīqat karnā

laakh mansūr kī ḳhātir rasan-o-dār sahī

azm-e-rāsiḳh hai to har gaam hai manzil ba-kanār

vahshat-āsār sivā darra-e-dushvār sahī

ābla-pā se bujhāte hī chalo tishna-labī

mumtahin jāda-e-auqāt kā har ḳhaar sahī

baḌh ke lenā hai hameñ jur.at-e-īsār se kaam

hā.il-e-rāh-e-junūd-e-ġham-o-āzār sahī

Daal do bahr-e-havādis meñ ḳhudā par kashtī

nā-ḳhudā dām-e-tavahhum meñ giraftār sahī

rāhbar jazba-e-sādiq dil-e-ma.asūm kā hai

har nafas ziist kā ik manzil-e-dushvār sahī

sarfaroshān-e-vatan aaj vatan kī ḳhātir

ek gulzār ho ta.amīr sar-e-dār sahī

husn-e-aḳhlāq se 'bebāk' raho sīna-sipar

dast-e-āġhyār meñ shamshīr-e-sharar-bār sahī

haq pasandon se jahan bar-sar-e-paikar sahi

kuchh dinon aur bhi ruswa sar-e-bazar sahi

KHun-e-masum se tamir hai bustan-e-wajud

ishrat-e-dahr se mahrum wafadar sahi

jehd-o-isar se raushan hai wafa ki qindil

dil-girafta haram-e-pak ka meamar sahi

mera iman hai elan-e-haqiqat karna

lakh mansur ki KHatir rasan-o-dar sahi

azm-e-rasiKH hai to har gam hai manzil ba-kanar

wahshat-asar siwa darra-e-dushwar sahi

aabla-pa se bujhate hi chalo tishna-labi

mumtahin jada-e-auqat ka har KHar sahi

baDh ke lena hai hamein jurat-e-isar se kaam

hail-e-rah-e-junud-e-gham-o-azar sahi

Dal do bahr-e-hawadis mein KHuda par kashti

na-KHuda dam-e-tawahhum mein giraftar sahi

rahbar jazba-e-sadiq dil-e-masum ka hai

har nafas zist ka ek manzil-e-dushwar sahi

sarfaroshan-e-watan aaj watan ki KHatir

ek gulzar ho tamir sar-e-dar sahi

husn-e-aKHlaq se 'bebak' raho sina-sipar

dast-e-aghyar mein shamshir-e-sharar-bar sahi