haq tere gham ka kuchh is tarah ada ho jae

haq tire ġham kā kuchh is tarah adā ho jaa.e

aah bhī aa.e laboñ par to duā ho jaa.e

dekh kar jis ko naqāboñ meñ bhī ḳhīra hai nazar

vo agar sāmne aa jaa.e to kyā ho jaa.e

mujh ko Dar hai ki tirī hashr-ḳhirāmī ke tufail

vaqt se pahle qayāmat na bapā ho jaa.e

apne chehre pe nigāheñ nahīñ uThtīñ us kī

maiñ jo ā.īna dikhā.ūñ to ḳhafā ho jaa.e

aa ke bas jaa.e jo us but kī mohabbat dil meñ

dil mirā qibla-e-arbāb-e-vafā ho jaa.e

maqsad-e-ishq farāmosh na ho jaa.e kahīñ

aap kā lutf agar had se sivā ho jaa.e

ham ko ma.alūm hai fir.aun kā anjām 'majīd'

koī chāhe to ba-sad-shauq ḳhudā ho jaa.e

haq tere gham ka kuchh is tarah ada ho jae

aah bhi aae labon par to dua ho jae

dekh kar jis ko naqabon mein bhi KHira hai nazar

wo agar samne aa jae to kya ho jae

mujh ko Dar hai ki teri hashr-KHirami ke tufail

waqt se pahle qayamat na bapa ho jae

apne chehre pe nigahen nahin uThtin us ki

main jo aaina dikhaun to KHafa ho jae

aa ke bas jae jo us but ki mohabbat dil mein

dil mera qibla-e-arbab-e-wafa ho jae

maqsad-e-ishq faramosh na ho jae kahin

aap ka lutf agar had se siwa ho jae

hum ko malum hai firaun ka anjam 'majid'

koi chahe to ba-sad-shauq KHuda ho jae