haq wafaon ka jafaon se ada karte hain log

haq vafāoñ kā jafāoñ se adā karte haiñ log

aaj kī duniyā ko kyā kahiye ki kyā karte haiñ log

aañkh pur-nam hoñT larzāñ dil ġhamoñ se paash paash

is tarah bhī zindagī kā sāmnā karte haiñ log

ai zamāne kī ravish terī vafā-koshī kī ḳhair

ahd-o-paimāñ toḌ kar va.ada vafā karte haiñ log

ai vafūr-e-zindagī ye bhī tirā e.ajāz hai

zahr piite haiñ musalsal aur jiyā karte haiñ log

utnā utnā dil meñ uThtā hai baġhāvat kā ġhubār

jitnā jitnā dil ko pāband-e-vafā karte haiñ log

us ke paane kī masarrat chand lamhe bhī nahīñ

jis ko kho kar umr bhar āh-o-bukā karte haiñ log

merī rūdād-e-alam meñ koī pahlū hai zarūr

sun ke rūdād-e-alam kyoñ hañs diyā karte haiñ log

jab bhī hotā hai jafāoñ kā kahīñ bhī tazkira

naam jaane kyoñ tumhārā le liyā karte haiñ log

sub.h-e-nau kī yaad meñ kaTtī hai har shām-e-firāq

sukh kī ummīdoñ meñ aksar dukh sahā karte haiñ log

ranj-o-ġham aish-o-masarrat dhuup bhī hai chhāñv bhī

hañste hañste zindagī meñ ro diyā karte haiñ log

kaun kaam aatā hai aaḌe vaqt par 'qādir' ye dekh

ziist ke har moḌ par yuuñ to milā karte haiñ log

haq wafaon ka jafaon se ada karte hain log

aaj ki duniya ko kya kahiye ki kya karte hain log

aankh pur-nam honT larzan dil ghamon se pash pash

is tarah bhi zindagi ka samna karte hain log

ai zamane ki rawish teri wafa-koshi ki KHair

ahd-o-paiman toD kar wada wafa karte hain log

ai wafur-e-zindagi ye bhi tera eajaz hai

zahr pite hain musalsal aur jiya karte hain log

utna utna dil mein uThta hai baghawat ka ghubar

jitna jitna dil ko paband-e-wafa karte hain log

us ke pane ki masarrat chand lamhe bhi nahin

jis ko kho kar umr bhar aah-o-buka karte hain log

meri rudad-e-alam mein koi pahlu hai zarur

sun ke rudad-e-alam kyon hans diya karte hain log

jab bhi hota hai jafaon ka kahin bhi tazkira

nam jaane kyon tumhaara le liya karte hain log

subh-e-nau ki yaad mein kaTti hai har sham-e-firaq

sukh ki ummidon mein aksar dukh saha karte hain log

ranj-o-gham aish-o-masarrat dhup bhi hai chhanw bhi

hanste hanste zindagi mein ro diya karte hain log

kaun kaam aata hai aaDe waqt par 'qadir' ye dekh

zist ke har moD par yun to mila karte hain log