haqiqaton ka aks ek KHwab-zar hi na ho

haqīqatoñ kā 'aks ek ḳhvāb-zār hī na ho

ye aa.ina bhī zindagī kā rāzdār hī na ho

mirī vo ik nigāh koī shāhkār hī na ho

kisī hasīn zindagī kā e'tibār hī na ho

fazāoñ kā sukūt ḳhushk pattiyoñ ke saaz par

kisī udaas lai meñ naġhma-e-bahār hī na ho

shafaq ‘urūs-e-shām ke laboñ kā ātishīñ-ḳhayāl

kisī sunahre āftāb kā mazār hī na ho

vo ik nazar jo terī samt uTh ga.ī kabhī kabhī

hamārī kam-nigāhiyoñ kī parda-dār hī na ho

phuvār ke hasīn raqs meñ na aa.e zindagī

agar ye pattiyoñ pe halkā sā ġhubār hī na ho

sukūñ hamārī quvvatoñ kī barhamī se kaañp uThā

sukūñ hamārī quvvatoñ kā intishār hī na ho

ḳhud apnī talḳhiyoñ meñ zindagī bhī kho ke rah ga.ī

haqīqatoñ se khelnā bhī ik farār hī na ho

surūd-o-raqs aur jaam kā 'kamāl' kā jahāñ

bahisht bhī taḳhayyul-e-gunāhgār hī na ho

haqiqaton ka 'aks ek KHwab-zar hi na ho

ye aaina bhi zindagi ka raazdar hi na ho

meri wo ek nigah koi shahkar hi na ho

kisi hasin zindagi ka e'tibar hi na ho

fazaon ka sukut KHushk pattiyon ke saz par

kisi udas lai mein naghma-e-bahaar hi na ho

shafaq ‘urus-e-sham ke labon ka aatishin-KHayal

kisi sunahre aaftab ka mazar hi na ho

wo ek nazar jo teri samt uTh gai kabhi kabhi

hamari kam-nigahiyon ki parda-dar hi na ho

phuwar ke hasin raqs mein na aae zindagi

agar ye pattiyon pe halka sa ghubar hi na ho

sukun hamari quwwaton ki barhami se kanp uTha

sukun hamari quwwaton ka intishaar hi na ho

KHud apni talKHiyon mein zindagi bhi kho ke rah gai

haqiqaton se khelna bhi ek farar hi na ho

surud-o-raqs aur jam ka 'kamal' ka jahan

bahisht bhi taKHayyul-e-gunahgar hi na ho