haqiqaton ki taraf dastan se niklenge

haqīqatoñ kī taraf dāstāñ se nikleñge

jo ek roz ham is ḳhāk-dāñ se nikleñge

na tār-tār girebāñ na ḳhaak uḌāte hue

kisī ke kūcha-e-nā-mehrbāñ se nikleñge

jahāñ koī nahīñ pohñchā vahāñ pahuñchnā hai

jahāñ koī nahīñ niklā vahāñ se nikleñge

kisī ke zaḳhm kisī kā badan uThā.egā

kisī ke tiir kisī kī kamāñ se nikleñge

zamīñ meñ jaanā hai yuuñ haiñ zamīn kī ḳhātir

ham āsmāñ ke liye āsmāñ se nikleñge

na phir ghaḌī kī ye Tik-Tik na girtī dīvāreñ

kabhī to qaid-e-zamān-o-makāñ se nikleñge

chhupe haiñ yuuñ ki talāsheñ hameñ na.ī nasleñ

ḳhamosh yuuñ haiñ ki un kī zabāñ se nikleñge

haqiqaton ki taraf dastan se niklenge

jo ek roz hum is KHak-dan se niklenge

na tar-tar gireban na KHak uDate hue

kisi ke kucha-e-na-mehrban se niklenge

jahan koi nahin pohncha wahan pahunchna hai

jahan koi nahin nikla wahan se niklenge

kisi ke zaKHm kisi ka badan uThaega

kisi ke tir kisi ki kaman se niklenge

zamin mein jaana hai yun hain zamin ki KHatir

hum aasman ke liye aasman se niklenge

na phir ghaDi ki ye Tik-Tik na girti diwaren

kabhi to qaid-e-zaman-o-makan se niklenge

chhupe hain yun ki talashen hamein nai naslen

KHamosh yun hain ki un ki zaban se niklenge