haqiqaton ko tasawwur se khinch late hain

haqīqatoñ ko tasavvur se khīñch laate haiñ

ham aise log kahānī nahīñ banāte haiñ

ajiib log haiñ bastī meñ raushnī ke liye

diyā jalāte nahīñ haiñ dhuāñ uḌāte haiñ

ilaaj maañg rahe haiñ ye nāqidīn-e-ahd

jo āftāb ko dīpak yahāñ dikhāte haiñ

tumhārī fikr kī baisākhiyāñ nahīñ lete

ham apnī fikr se apnā jahāñ banāte haiñ

hamāre paañv ke chhāle hamārī manzil tak

ubal ubal ke nayā rāsta banāte haiñ

kalām kartī haiñ aksar vo jāgtī āñkheñ

unheñ ham apne tasavvur meñ jab sajāte haiñ

purānī fikr pe qaa.em hai ye na.ī duniyā

ham us ko roz hī paḌhte haiñ bhuul jaate haiñ

kisī tarah se na kar pā.ūñgā tirī taqlīd

mire ḳhayāl ke aahū mujhe bulāte haiñ

hamārā kaam hai barsoñ se bas yahī raahī

bhaTak ga.e jo unheñ rāsta dikhāte haiñ

haqiqaton ko tasawwur se khinch late hain

hum aise log kahani nahin banate hain

ajib log hain basti mein raushni ke liye

diya jalate nahin hain dhuan uDate hain

ilaj mang rahe hain ye naqidin-e-ahd

jo aaftab ko dipak yahan dikhate hain

tumhaari fikr ki baisakhiyan nahin lete

hum apni fikr se apna jahan banate hain

hamare panw ke chhaale hamari manzil tak

ubal ubal ke naya rasta banate hain

kalam karti hain aksar wo jagti aankhen

unhen hum apne tasawwur mein jab sajate hain

purani fikr pe qaem hai ye nai duniya

hum us ko roz hi paDhte hain bhul jate hain

kisi tarah se na kar paunga teri taqlid

mere KHayal ke aahu mujhe bulate hain

hamara kaam hai barson se bas yahi rahi

bhaTak gae jo unhen rasta dikhate hain