haqq-e-neamat ada nahin hota

haqq-e-ne.amat adā nahīñ hotā

ham se shukr-e-ḳhudā nahīñ hotā

kyā visāl-e-ḳhudā nahīñ hotā

ishq-e-sādiq se kyā nahīñ hotā

be-bahā dil ko nazr kartā kaun

husn agar dilrubā nahīñ hotā

aah par hans ke ye diyā ta.ana

yuuñ to nām-e-vafā nahīñ hotā

huuñ agar laakh baar bhī sadqe

husn kā den adā nahīñ hotā

hijr meñ ġham-gusār mahram-e-rāz

dard-o-ġham ke sivā nahīñ hotā

jo satātā hai dil jalātā hai

us kā hargiz bhalā nahīñ hotā

ishq kā naam muft hai badnām

ishq achchhā burā nahīñ hotā

aah se arsh hiltā hai ai 'shād'

fazl-e-maulā se kyā nahīñ hotā

haqq-e-neamat ada nahin hota

hum se shukr-e-KHuda nahin hota

kya visal-e-KHuda nahin hota

ishq-e-sadiq se kya nahin hota

be-baha dil ko nazr karta kaun

husn agar dilruba nahin hota

aah par hans ke ye diya tana

yun to nam-e-wafa nahin hota

hun agar lakh bar bhi sadqe

husn ka den ada nahin hota

hijr mein gham-gusar mahram-e-raaz

dard-o-gham ke siwa nahin hota

jo satata hai dil jalata hai

us ka hargiz bhala nahin hota

ishq ka nam muft hai badnam

ishq achchha bura nahin hota

aah se arsh hilta hai ai 'shad'

fazl-e-maula se kya nahin hota