har anjuman mein dawa-e-wahsaht kiya karo

har anjuman meñ dāva-e-vahsaht kiyā karo

kuḌhtā ho jī to logoñ se nafrat kiyā karo

jin dostoñ ke bal pe sajāte ho bazm-e-ḳhās

in sab kī ehtiyāt se ġhībat kiyā karo

tauba karo jo sub.h meñ TuuTe badan kī shāḳh

shab meñ bayān mai kī fazīlat kiyā karo

ghar se chalo to zeb karo tauq-e-buzdilī

ghar meñ raho to azm-e-shujā.at kiyā karo

karte raho harīfoñ se elān-e-sar-kashī

lekin milo to un kī itā.at kiyā karo

dillī meñ ham-nashīnoñ se 'sūfī' ḳhudā bachā.e

bas duur rah ke apnī hifāzat kiyā karo

har anjuman mein dawa-e-wahsaht kiya karo

kuDhta ho ji to logon se nafrat kiya karo

jin doston ke bal pe sajate ho bazm-e-KHas

in sab ki ehtiyat se ghibat kiya karo

tauba karo jo subh mein TuTe badan ki shaKH

shab mein bayan mai ki fazilat kiya karo

ghar se chalo to zeb karo tauq-e-buzdili

ghar mein raho to azm-e-shujaat kiya karo

karte raho harifon se elan-e-sar-kashi

lekin milo to un ki itaat kiya karo

dilli mein ham-nashinon se 'sufi' KHuda bachae

bas dur rah ke apni hifazat kiya karo