har bure waqt ke afaal badal deta hai

har bure vaqt ke afa.āl badal detā hai

ishq dānāoñ ke aqvāl badal detā hai

barg-e-jāñ hai.at-e-ajzā kā pareshān sā juz

dekhte dekhte ashkāl badal detā hai

vaqt bedār magar hai to taġhayyur kā asiir

jo badalnā ho ba-har-hāl badal detā hai

ik zarā sabr ki parvāz kā ḳhāliq yak-dam

vaqt aane pe par-o-bāl badal detā hai

koī majzūb-e-ilāh jazb-o-junūñ meñ aa kar

kurra-e-arz ke abdāl badal detā hai

haath aa jaa.e agar nusḳha-e-aqavāl-e-'alī'

ek ik qaul-e-mah-o-sāl badal detā hai

har bure waqt ke afaal badal deta hai

ishq danaon ke aqwal badal deta hai

barg-e-jaan haiat-e-ajza ka pareshan sa juz

dekhte dekhte ashkal badal deta hai

waqt bedar magar hai to taghayyur ka asir

jo badalna ho ba-har-haal badal deta hai

ek zara sabr ki parwaz ka KHaliq yak-dam

waqt aane pe par-o-baal badal deta hai

koi majzub-e-ilah jazb-o-junun mein aa kar

kurra-e-arz ke abdal badal deta hai

hath aa jae agar nusKHa-e-aqawal-e-'ali'

ek ek qaul-e-mah-o-sal badal deta hai