har chand ki pyara tha main suraj ki nazar ka

har chand ki pyārā thā maiñ sūraj kī nazar kā

phir bhī mujhe khaTkā hī rahā shab ke safar kā

uljhī hai bahut jism se dariyā kī ravānī

is chobī mahal kā koī taḳhta bhī na sar kā

Duubā huā aivān-e-shafaq bhī hai dhueñ meñ

be-rañg sā har naqsh hai dīvār-e-sahar kā

riste hue nāsūr pe chalte rahe nashtar

taaza hī rahā phuul sadā zaḳhm-e-hunar kā

maiñ huuñ ki kaḌī dhuup ke sahrā meñ ghirā huuñ

saaya kahīñ miltā hī nahīñ shāḳh-e-shajar kā

mazlūm thā maiñ kal bhī to mahrūm huuñ ab bhī

unvān badaltā hī nahīñ merī ḳhabar kā

bijlī to sunā hai kahīñ jañgal meñ girī thī

utrā huā chehra hai chaman meñ gul-e-tar kā

tab barf ke mahtāb se phūTeñgī shuā.eñ

bujh jā.egā jab sho.ala mire dāġh-e-jigar kā

ā.īna shikasta huā chubhne lagīñ palkeñ

nazzāra bhī dekhā na gayā rūp-nagar kā

aaseb ho sarsar ho balā ho ki qazā ho

sab ke liye darvāza khulā hai mire ghar kā

uḌtī hī rahī ḳhāk-e-badan tez havā meñ

ehsān ye kuchh kam to nahīñ barq-o-sharar kā

miT jā.eñgī peshānī-e-marmar se lakīreñ

ab rañg utar jā.egā tā.ūs ke par kā

ḳhushiyoñ kā chamak-dār hiran haath na aayā

pīchhā kyā aahoñ ne bahut jazb-o-asar kā

kis tarah mayassar ho mujhe arsa-e-rāhat

har lahza na.ī choT nayā ġham nayā charkā

'siddīq' jinheñ rāh-e-vafā maiñ ne sujhā.ī

patthar vahī kahte haiñ mujhe rāhguzar kā

har chand ki pyara tha main suraj ki nazar ka

phir bhi mujhe khaTka hi raha shab ke safar ka

uljhi hai bahut jism se dariya ki rawani

is chobi mahal ka koi taKHta bhi na sar ka

Duba hua aiwan-e-shafaq bhi hai dhuen mein

be-rang sa har naqsh hai diwar-e-sahar ka

riste hue nasur pe chalte rahe nashtar

taza hi raha phul sada zaKHm-e-hunar ka

main hun ki kaDi dhup ke sahra mein ghira hun

saya kahin milta hi nahin shaKH-e-shajar ka

mazlum tha main kal bhi to mahrum hun ab bhi

unwan badalta hi nahin meri KHabar ka

bijli to suna hai kahin jangal mein giri thi

utra hua chehra hai chaman mein gul-e-tar ka

tab barf ke mahtab se phuTengi shuaen

bujh jaega jab shoala mere dagh-e-jigar ka

aaina shikasta hua chubhne lagin palken

nazzara bhi dekha na gaya rup-nagar ka

aaseb ho sarsar ho bala ho ki qaza ho

sab ke liye darwaza khula hai mere ghar ka

uDti hi rahi KHak-e-badan tez hawa mein

ehsan ye kuchh kam to nahin barq-o-sharar ka

miT jaengi peshani-e-marmar se lakiren

ab rang utar jaega taus ke par ka

KHushiyon ka chamak-dar hiran hath na aaya

pichha kya aahon ne bahut jazb-o-asar ka

kis tarah mayassar ho mujhe arsa-e-rahat

har lahza nai choT naya gham naya charka

'siddiq' jinhen rah-e-wafa main ne sujhai

patthar wahi kahte hain mujhe rahguzar ka