har chehre par KHauf ki chadar shoalon ki barish ghar ghar

har chehre par ḳhauf kī chādar sho.aloñ kī bārish ghar ghar

suunī āñkheñ dekh rahī haiñ jalte shahr kā ye manzar

pattā bhī khaḌke to dil sīnoñ meñ ḳhauf se phaT jaa.eñ

kitnī chīḳhoñ kā madfan hai sahmā huā ḳhāmosh nagar

chehre kī tahrīr ke pīchhe kyā dukh hai ye bhī samjho

maiñ koī aḳhbār nahīñ huuñ tum rakh do jis ko paḌh kar

ham hī kuchh nādān the jaane kitne ḳhvāb sajā baiThe

aas ne yuuñ hī dekh liyā thā chalte chalte ek nazar

jab bhī guzartā hai koī āvāra havāoñ kā jhoñkā

taptī Tiin kī ūñchī chhat par bajne lagte haiñ kankar

pīchhe rah jaane vāloñ par kis muñh se ilzām dhareñ

ham jis kī aglī saf meñ the haar gayā hai vo lashkar

koī patthar pheñk ke is meñ apnā aks miTā Dāleñ

jaltī ret meñ kho jā.egī ye naddī aage chal kar

'rāshid' kis ummīd pe dil kā ā.īna chamkāte ho

jaane kyā tasvīr dikhā.e dhuñdlā dhuñdlā san sattar

har chehre par KHauf ki chadar shoalon ki barish ghar ghar

suni aankhen dekh rahi hain jalte shahr ka ye manzar

patta bhi khaDke to dil sinon mein KHauf se phaT jaen

kitni chiKHon ka madfan hai sahma hua KHamosh nagar

chehre ki tahrir ke pichhe kya dukh hai ye bhi samjho

main koi aKHbar nahin hun tum rakh do jis ko paDh kar

hum hi kuchh nadan the jaane kitne KHwab saja baiThe

aas ne yun hi dekh liya tha chalte chalte ek nazar

jab bhi guzarta hai koi aawara hawaon ka jhonka

tapti Tin ki unchi chhat par bajne lagte hain kankar

pichhe rah jaane walon par kis munh se ilzam dharen

hum jis ki agli saf mein the haar gaya hai wo lashkar

koi patthar phenk ke is mein apna aks miTa Dalen

jalti ret mein kho jaegi ye naddi aage chal kar

'rashid' kis ummid pe dil ka aaina chamkate ho

jaane kya taswir dikhae dhundla dhundla san sattar