har dam kuchh iztirab ke aise bhanwar mein hun

har dam kuchh iztirāb ke aise bhañvar meñ huuñ

jaise kisī duā-e-zarar ke asar meñ huuñ

bah jā.ūñ ban ke sail-e-ravāñ is zamīn par

maiñ ik udaas shaam kisī chashm-e-tar meñ huuñ

ḳhud kī talāsh meñ hī zamāne guzar ga.e

kyā apnī justujū hī ke dām-e-sahar meñ huuñ

jaise kisī ujaaḌ ḳharābe meñ guuñj ho

maujūd is tarah tire dīvār-o-dar meñ huuñ

manzil-shanās ban na sakā maiñ to kyā huā

itnā to jāntā huuñ ki rāh-e-safar meñ huuñ

'āsim' mizāj meñ haiñ tamannā.eñ is tarah

jaise maiñ aaj tak koī bachcha sā ghar meñ huuñ

har dam kuchh iztirab ke aise bhanwar mein hun

jaise kisi dua-e-zarar ke asar mein hun

bah jaun ban ke sail-e-rawan is zamin par

main ek udas sham kisi chashm-e-tar mein hun

KHud ki talash mein hi zamane guzar gae

kya apni justuju hi ke dam-e-sahar mein hun

jaise kisi ujaD KHarabe mein gunj ho

maujud is tarah tere diwar-o-dar mein hun

manzil-shanas ban na saka main to kya hua

itna to jaanta hun ki rah-e-safar mein hun

'asim' mizaj mein hain tamannaen is tarah

jaise main aaj tak koi bachcha sa ghar mein hun