har ehtiyat ka pahlu nazar mein rakhta hai

har ehtiyāt kā pahlū nazar meñ rakhtā hai

chhupā chhupā ke mujhe apne ghar meñ rakhtā hai

kiyā huā hai mire gird ek halqa sā

kahīñ bhī ho mujhe apne asar meñ rakhtā hai

vo ittifāq se mil jaa.e rāste meñ kahīñ

mujhe ye shauq musalsal safar meñ rakhtā hai

agarche koī use dekhtā nahīñ phir bhī

tamām shahr kī āñkheñ nazar meñ rakhtā hai

koī bhī daaġh maiñ us se chhupā nahīñ saktā

vo tābkār shu'ā'eñ nazar meñ rakhtā hai

lachak nahīñ kisī buniyād meñ magar bhūchāl

kis e'timād se dīvār-o-dar meñ rakhtā hai

vo apne paas bulātā bhī hai mujhe 'āsim'

rukāvaTeñ bhī mirī rahguzar meñ rakhtā hai

har ehtiyat ka pahlu nazar mein rakhta hai

chhupa chhupa ke mujhe apne ghar mein rakhta hai

kiya hua hai mere gird ek halqa sa

kahin bhi ho mujhe apne asar mein rakhta hai

wo ittifaq se mil jae raste mein kahin

mujhe ye shauq musalsal safar mein rakhta hai

agarche koi use dekhta nahin phir bhi

tamam shahr ki aankhen nazar mein rakhta hai

koi bhi dagh main us se chhupa nahin sakta

wo tabkar shu'a'en nazar mein rakhta hai

lachak nahin kisi buniyaad mein magar bhuchaal

kis e'timad se diwar-o-dar mein rakhta hai

wo apne pas bulata bhi hai mujhe 'asim'

rukawaTen bhi meri rahguzar mein rakhta hai