har ek baat pe kahte ho marhaba na kaho

har ek baat pe kahte ho marhabā na kaho

kaho to phir ġham-e-dil kā ye mājrā na kaho

majāz husn-e-haqīqat hai barmalā na kaho

magar ye raaz sadāqat se māvarā na kaho

hasīn shakl ke insāñ ko rahnumā na kaho

vo nā-ḳhudā-e-sitam hai use ḳhudā na kaho

suḳhan-shanās jo tum ho to barmalā na kaho

ġhazal ke sher ko iz.hār-e-mudda’ā na kaho

misāl-e-tūr abhī ḳhvāb hoñge chaknā-chūr

dil-o-nigāh meñ kyā kuchh hai fāsla na kaho

sarāb kī sī haqīqat hai us meñ poshīda

chamakne vaalī har ik shai ko aa.ina na kaho

baġhair lutf kahāñ ġham kī yūrisheñ paiham

'atā-e-dost kaho is ko tum jafā na kaho

vo āgahī kī manāzil unheñ nasīb kahāñ

janāb-e-shaiḳh ko rindo magar burā na kaho

sukūñ-navāz talattuf 'ilāj hai is kā

junūn-e-ishq ko ik marz-e-lā-davā na kaho

sharīk-e-hāl yahāñ kaun kis kā hotā hai

musībatoñ kā har ik se ye vāqi.a na kaho

ba-chashm-e-ḳhās vo maa.il idhar to haiñ lekin

ye ibtidā.ī marāhil haiñ intihā na kaho

ba-hosh-bāsh ki hai pās-e-ehtiyāt yahī

ġhamoñ pe aah masarrat pe vāh-vā na kaho

ye muskurāhaTeñ 'alavī' kī tanziya haiñ nadīm

tabāhiyoñ kā huā ḳhatm silsila na kaho

har ek baat pe kahte ho marhaba na kaho

kaho to phir gham-e-dil ka ye majra na kaho

majaz husn-e-haqiqat hai barmala na kaho

magar ye raaz sadaqat se mawara na kaho

hasin shakl ke insan ko rahnuma na kaho

wo na-KHuda-e-sitam hai use KHuda na kaho

suKHan-shanas jo tum ho to barmala na kaho

ghazal ke sher ko izhaar-e-mudda’a na kaho

misal-e-tur abhi KHwab honge chakna-chur

dil-o-nigah mein kya kuchh hai fasla na kaho

sarab ki si haqiqat hai us mein poshida

chamakne wali har ek shai ko aaina na kaho

baghair lutf kahan gham ki yurishen paiham

'ata-e-dost kaho is ko tum jafa na kaho

wo aagahi ki manazil unhen nasib kahan

janab-e-shaiKH ko rindo magar bura na kaho

sukun-nawaz talattuf 'ilaj hai is ka

junun-e-ishq ko ek marz-e-la-dawa na kaho

sharik-e-haal yahan kaun kis ka hota hai

musibaton ka har ek se ye waqia na kaho

ba-chashm-e-KHas wo mail idhar to hain lekin

ye ibtidai marahil hain intiha na kaho

ba-hosh-bash ki hai pas-e-ehtiyat yahi

ghamon pe aah masarrat pe wah-wa na kaho

ye muskurahaTen 'alawi' ki tanziya hain nadim

tabahiyon ka hua KHatm silsila na kaho