har ek gam pe aasudgi khaDi hogi

har ek gaam pe āsūdgī khaḌī hogī

safar kī āḳhirī manzil bahut kaḌī hogī

ye apne ḳhuun kī lahroñ meñ Dūbtī kashtī

bhañvar se bhaag ke sāhil pe jā paḌī hogī

musāfiro ye ḳhalish nok-e-ḳhār kī to nahīñ

zarūr paañv tale koī pankhuḌī hogī

tire ḳhulūs-e-tahaffuz meñ shak nahīñ lekin

havā meñ ret kī dīvār gir paḌī hogī

nizām-e-qaid-e-musalsal meñ kaisī āzādī

khule jo paañv to hāthoñ meñ hathkaḌī hogī

tire farār kī sarhad qarīb thī lekin

mirī talāsh zarā duur jā paḌī hogī

tumhāre daur-e-musalsal kī munzabit tārīḳh

hamāre raqs-e-musalsal kī ik kaḌī hogī

mire gumān kī buniyād khokhlī niklī

tire yaqīñ kī 'imārat kahāñ khaḌī hogī

har ek gam pe aasudgi khaDi hogi

safar ki aaKHiri manzil bahut kaDi hogi

ye apne KHun ki lahron mein Dubti kashti

bhanwar se bhag ke sahil pe ja paDi hogi

musafiro ye KHalish nok-e-KHar ki to nahin

zarur panw tale koi pankhuDi hogi

tere KHulus-e-tahaffuz mein shak nahin lekin

hawa mein ret ki diwar gir paDi hogi

nizam-e-qaid-e-musalsal mein kaisi aazadi

khule jo panw to hathon mein hathkaDi hogi

tere farar ki sarhad qarib thi lekin

meri talash zara dur ja paDi hogi

tumhaare daur-e-musalsal ki munzabit tariKH

hamare raqs-e-musalsal ki ek kaDi hogi

mere guman ki buniyaad khokhli nikli

tere yaqin ki 'imarat kahan khaDi hogi