har ek gam pe sajda yahan rawa hoga

har ek gaam pe sajda yahāñ ravā hogā

ḳhudī kā daur hai har shaḳhs ab ḳhudā hogā

ba-nām-e-fasl-e-bahārāñ ḳhizāñ kī puujā hai

yahī mazāq-e-gulistāñ rahā to kyā hogā

dhuāñ sā uThne lagā dil se ahl-e-mahfil meñ

nayā charāġh koī bazm meñ jalā hogā

tumhāre shahr meñ aa.e haiñ ahl-e-ġhurbat phir

is aas par ki koī dard-āshnā hogā

jaras hai un kā sadā un kī kārvāñ un ke

sivā.e gard-e-safar mere paas kyā hogā

kabhī na ahd-e-junūñ meñ kisī ne sochā thā

ḳhirad kā daur bahut sabr-āzmā hogā

'nasīm' ham se hai zinda jahāñ meñ nām-e-vafā

hamāre ba.ad zamāna badal chukā hogā

har ek gam pe sajda yahan rawa hoga

KHudi ka daur hai har shaKHs ab KHuda hoga

ba-nam-e-fasl-e-bahaaran KHizan ki puja hai

yahi mazaq-e-gulistan raha to kya hoga

dhuan sa uThne laga dil se ahl-e-mahfil mein

naya charagh koi bazm mein jala hoga

tumhaare shahr mein aae hain ahl-e-ghurbat phir

is aas par ki koi dard-ashna hoga

jaras hai un ka sada un ki karwan un ke

siwae gard-e-safar mere pas kya hoga

kabhi na ahd-e-junun mein kisi ne socha tha

KHirad ka daur bahut sabr-azma hoga

'nasim' hum se hai zinda jahan mein nam-e-wafa

hamare baad zamana badal chuka hoga