har ek haal mein chalne se jis ko kaam raha

har ek haal meñ chalne se jis ko kaam rahā

vo shaḳhs qā.id-e-yārān-e-tez-gām rahā

safar alāmat-e-hastī safar dalīl-e-hayāt

ḳhushā vo log safar jin kā nā-tamām rahā

hayāt-e-gul kā hayāt-e-chaman hai paimāna

amar hai phuul chaman ko agar davām rahā

bayāz-e-mehr nigal kar bhī raat raat rahī

siyāhkār kā chehra siyāh-fām rahā

hayāt-o-maut ke sañgam pe jī rahe haiñ ham

hamārā jashn-e-tarab bhī ġham-iltizām rahā

zamāna ḳhud ko muḳhātab samajh na le merā

maiñ apne aap se dar-asl ham-kalām rahā

ajiib 'ja.afar'-e-farḳhanda-jāñ kā mashrab hai

ki riñd ho ke bhī ḳhush-baḳht nek-nām rahā

har ek haal mein chalne se jis ko kaam raha

wo shaKHs qaid-e-yaran-e-tez-gam raha

safar alamat-e-hasti safar dalil-e-hayat

KHusha wo log safar jin ka na-tamam raha

hayat-e-gul ka hayat-e-chaman hai paimana

amar hai phul chaman ko agar dawam raha

bayaz-e-mehr nigal kar bhi raat raat rahi

siyahkar ka chehra siyah-fam raha

hayat-o-maut ke sangam pe ji rahe hain hum

hamara jashn-e-tarab bhi gham-iltizam raha

zamana KHud ko muKHatab samajh na le mera

main apne aap se dar-asl ham-kalam raha

ajib 'jafar'-e-farKHanda-jaan ka mashrab hai

ki rind ho ke bhi KHush-baKHt nek-nam raha