har ek jaanib hai raqs karti ajib si chup

har ek jānib hai raqs kartī 'ajīb sī chup

ye dil ke āñgan meñ nauha likhtī 'ajīb sī chup

rah-e-vafā meñ jahāñ pe bhaTkā thā ik musāfir

vahīñ kahīñ pe hai haath maltī 'ajīb sī chup

hai kuchh sadāoñ kā pīchhā kartī mirī samā'at

aur ik ḳhamoshī se mujh ko taktī 'ajīb sī chup

vo merī palkoñ ke saa.e saa.e vafā kī beleñ

aur un se ḳhvāboñ ke phuul chuntī 'ajīb sī chup

ufuq pe yādoñ ke zard āñchal meñ lipTā sūraj

aur us pe shāmoñ ke saath Dhaltī 'ajīb sī chup

vo pichhle mausam kā haath thāme hasīn manzar

vo agle mausam meñ us se laḌtī 'ajīb sī chup

vo ḳhush-gumānī kī koñpaloñ par khilī tamannā

aur us ke haq meñ du'ā.eñ kartī 'ajīb sī chup

vo sard rātoñ meñ āñsuon ke charāġh raushan

aur un charāġhoñ kī lau meñ jaltī 'ajīb sī chup

vo ḳhvāhishoñ ke badan se uThtī sunahrī ḳhushbū

vo dil ke mausam meñ chhup ke rotī 'ajīb sī chup

har ek jaanib hai raqs karti 'ajib si chup

ye dil ke aangan mein nauha likhti 'ajib si chup

rah-e-wafa mein jahan pe bhaTka tha ek musafir

wahin kahin pe hai hath malti 'ajib si chup

hai kuchh sadaon ka pichha karti meri sama'at

aur ek KHamoshi se mujh ko takti 'ajib si chup

wo meri palkon ke sae sae wafa ki belen

aur un se KHwabon ke phul chunti 'ajib si chup

ufuq pe yaadon ke zard aanchal mein lipTa suraj

aur us pe shamon ke sath Dhalti 'ajib si chup

wo pichhle mausam ka hath thame hasin manzar

wo agle mausam mein us se laDti 'ajib si chup

wo KHush-gumani ki konpalon par khili tamanna

aur us ke haq mein du'aen karti 'ajib si chup

wo sard raaton mein aansuon ke charagh raushan

aur un charaghon ki lau mein jalti 'ajib si chup

wo KHwahishon ke badan se uThti sunahri KHushbu

wo dil ke mausam mein chhup ke roti 'ajib si chup