har ek rah mein imkan-e-hadisa hai abhi

har ek raah meñ imkān-e-hādisa hai abhī

ki kho na jā.ūñ añdhere meñ sochnā hai abhī

tamām umr vo chaltā rahā hai sahrā meñ

ghane daraḳht ke saa.e meñ jo khaḌā hai abhī

sukūn tere tasavvur se jis ko miltā hai

vo terī diid ko lekin taḌap rahā hai abhī

har ek shaḳhs ke chehre pe ḳhauf taarī hai

na jaane kaun añdhere meñ chīḳhtā hai abhī

vo kho gayā hai kahīñ bhiiḌ meñ to kyā kījiye

jo dukh hai us ke na milne kā vo judā hai abhī

Thahar ga.e ho sar-e-rāh kis liye āḳhir

chale bhī jaao ki koī balā rahā hai abhī

darīcha khol ke 'nayyar' na dekhiye bāhar

lahūluhān manāzir kā silsila hai abhī

har ek rah mein imkan-e-hadisa hai abhi

ki kho na jaun andhere mein sochna hai abhi

tamam umr wo chalta raha hai sahra mein

ghane daraKHt ke sae mein jo khaDa hai abhi

sukun tere tasawwur se jis ko milta hai

wo teri did ko lekin taDap raha hai abhi

har ek shaKHs ke chehre pe KHauf tari hai

na jaane kaun andhere mein chiKHta hai abhi

wo kho gaya hai kahin bhiD mein to kya kijiye

jo dukh hai us ke na milne ka wo juda hai abhi

Thahar gae ho sar-e-rah kis liye aaKHir

chale bhi jao ki koi bala raha hai abhi

daricha khol ke 'nayyar' na dekhiye bahar

lahuluhan manazir ka silsila hai abhi