har ek samt udasi ki titliyan jagin

har ek samt udāsī kī titliyāñ jāgīñ

tulū-e-shām se pahle siyāhiyāñ jāgīñ

safar meñ dhuup kī lazzat pas-e-ġhubār huī

ghane daraḳhtoñ ke saa.e meñ garmiyāñ jāgīñ

dayār-e-dil meñ sadāoñ kā ā.īna TuuTā

navāh-e-jāñ meñ ta.alluq kī kirchiyāñ jāgīñ

kahāñ kahāñ nahīñ dī ham ne raat bhar dastak

na koī baab hī chauñkā na khiḌkiyāñ jāgīñ

diloñ ke biich to haa.il thā barf kā mausam

na jism sulge na ḳhvāhish kī garmiyāñ jāgīñ

lahū meñ lams ke sho.ale buland hone lage

badan meñ qurb kī pur-shor āñdhiyāñ jāgīñ

kisī se kam na huā 'nāz' fāsla ġham kā

ki log jitnā chale utnī dūriyāñ jāgīñ

har ek samt udasi ki titliyan jagin

tulu-e-sham se pahle siyahiyan jagin

safar mein dhup ki lazzat pas-e-ghubar hui

ghane daraKHton ke sae mein garmiyan jagin

dayar-e-dil mein sadaon ka aaina TuTa

nawah-e-jaan mein talluq ki kirchiyan jagin

kahan kahan nahin di hum ne raat bhar dastak

na koi bab hi chaunka na khiDkiyan jagin

dilon ke bich to hail tha barf ka mausam

na jism sulge na KHwahish ki garmiyan jagin

lahu mein lams ke shoale buland hone lage

badan mein qurb ki pur-shor aandhiyan jagin

kisi se kam na hua 'naz' fasla gham ka

ki log jitna chale utni duriyan jagin