har ek sang ko yunhi KHuda nahin karte

har ek sang ko yūñhī ḳhudā nahīñ karte

na ho ḳhulūs to sajde kiyā nahīñ karte

baġhair ġhusl-o-vuzū pākī-o-tahārat ke

namāz-e-ishq ko ham bhī adā nahīñ karte

agar jhukāte haiñ sar ko jo bārgah meñ kabhī

koī numūd dikhāvā riyā nahīñ karte

vo tuur vaale haiñ jā-e-zuhūr se haT kar

har ik maqām pe raushan diyā nahīñ karte

vafā sabāt hai jin ke ḳhamīr meñ shāmil

kisī ke saath meñ hargiz daġhā nahīñ karte

ġhalat hai jaan ke tark-e-shanāvarī karnā

har ek siip meñ motī huā nahīñ karte

maiñ ek ins huuñ aadam kī iqtidā meñ sadā

vo be-hisī ke farishte ḳhatā nahīñ karte

imām-e-vaqt haiñ shīrāza-e-umam ke ḳhilāf

ye muqtadī haiñ jo ḳhud ko qabā nahīñ karte

maiñ DhūñDhtā huuñ har ik samt gauhar-e-nāyāb

ye aur baat hai mujh ko milā nahīñ karte

har ek sang ko yunhi KHuda nahin karte

na ho KHulus to sajde kiya nahin karte

baghair ghusl-o-wuzu paki-o-tahaarat ke

namaz-e-ishq ko hum bhi ada nahin karte

agar jhukate hain sar ko jo bargah mein kabhi

koi numud dikhawa riya nahin karte

wo tur wale hain ja-e-zuhur se haT kar

har ek maqam pe raushan diya nahin karte

wafa sabaat hai jin ke KHamir mein shamil

kisi ke sath mein hargiz dagha nahin karte

ghalat hai jaan ke tark-e-shanawari karna

har ek sip mein moti hua nahin karte

main ek ins hun aadam ki iqtida mein sada

wo be-hisi ke farishte KHata nahin karte

imam-e-waqt hain shiraaza-e-umam ke KHilaf

ye muqtadi hain jo KHud ko qaba nahin karte

main DhunDhta hun har ek samt gauhar-e-nayab

ye aur baat hai mujh ko mila nahin karte