har ek shaKHs KHafa mujhse anjuman mein tha

har ek shaḳhs ḳhafā mujh se anjuman meñ thā

ki mere lab pe vahī thā jo mere man meñ thā

kasak uThī thī kuchh aisī ki chīḳh chīḳh paḌūñ

rahā maiñ chup hī ki bahroñ kī anjuman meñ thā

ulajh ke rah ga.ī jaame kī dilkashī meñ nazar

use kisī ne na dekhā jo pairahan meñ thā

kabhī maiñ dasht meñ āvāra ik bagūlā sā

kabhī maiñ nik.hat-e-gul kī tarah chaman meñ thā

maiñ us ko qatl na kartā to ḳhud-kushī kartā

vo ik harīf kī sūrat mire badan meñ thā

usī ko mere shab-o-roz par muhīt na kar

vo ek lamha-e-kamzor jo gahan meñ thā

mirī sadā bhī na mujh ko sunā.ī dī 'sābir'

kuchh aisā shor bapā sahn-e-anjuman meñ thā

har ek shaKHs KHafa mujh se anjuman mein tha

ki mere lab pe wahi tha jo mere man mein tha

kasak uThi thi kuchh aisi ki chiKH chiKH paDun

raha main chup hi ki bahron ki anjuman mein tha

ulajh ke rah gai jame ki dilkashi mein nazar

use kisi ne na dekha jo pairahan mein tha

kabhi main dasht mein aawara ek bagula sa

kabhi main nikhat-e-gul ki tarah chaman mein tha

main us ko qatl na karta to KHud-kushi karta

wo ek harif ki surat mere badan mein tha

usi ko mere shab-o-roz par muhit na kar

wo ek lamha-e-kamzor jo gahan mein tha

meri sada bhi na mujh ko sunai di 'sabir'

kuchh aisa shor bapa sahn-e-anjuman mein tha