har fasil-e-rah ko zer-o-zabar karte hue

har fasīl-e-rāh ko zer-o-zabar karte hue

maiñ yahāñ pahuñchā huuñ qarnoñ kā safar karte hue

tishnagī ab tak na sairābī kī manzil pā sakī

zindagī guzrī tavāf-e-bām-o-dar karte hue

bol ai bād-e-ḳhizāñ kyoñ aa gayā itnā jalāl

kuchh na sochā baaġh ko zer-o-zabar karte hue

jism saarā ban gayā ḳhūnīñ qabā kā aa.ina

ḳhār-zār-e-zindagī ko rahguzar karte hue

kitne mausam kitne roz-o-shab lahū karne paḌe

naḳhl-e-jāñ ko hāmil-e-barg-o-samar karte hue

ek lamha bhī nahīñ lagtā guloñ kī shāḳh ko

phuul se alfāz ko nazr-e-sharar karte hue

āsmāñ chhūne kī lālach meñ zamīñ par aa ga.e

josh maarā ḳhuun ne kohsār sar karte hue

naqsh-e-pā chhoḌe the pīchhe aane vāloñ ke liye

ḳhaak meñ gum ho ga.e lekin ḳhabar karte hue

har fasil-e-rah ko zer-o-zabar karte hue

main yahan pahuncha hun qarnon ka safar karte hue

tishnagi ab tak na sairabi ki manzil pa saki

zindagi guzri tawaf-e-baam-o-dar karte hue

bol ai baad-e-KHizan kyon aa gaya itna jalal

kuchh na socha bagh ko zer-o-zabar karte hue

jism sara ban gaya KHunin qaba ka aaina

KHar-zar-e-zindagi ko rahguzar karte hue

kitne mausam kitne roz-o-shab lahu karne paDe

naKHl-e-jaan ko hamil-e-barg-o-samar karte hue

ek lamha bhi nahin lagta gulon ki shaKH ko

phul se alfaz ko nazr-e-sharar karte hue

aasman chhune ki lalach mein zamin par aa gae

josh mara KHun ne kohsar sar karte hue

naqsh-e-pa chhoDe the pichhe aane walon ke liye

KHak mein gum ho gae lekin KHabar karte hue