har fitna-o-tafriq se bezar hain hum log

har fitna-o-tafrīq se bezār haiñ ham log

saa.il haiñ mohabbat ke talabgār haiñ ham log

hindū na musalmān na īsā.ī na sikh haiñ

is mulk kī tahzīb ke mīnār haiñ ham log

ta.amīr-e-gulistāñ meñ lahū sab kā hai shāmil

hai faḳhr ki is mulk ke me.amār haiñ ham log

tafrīq-o-ta.assub ke jo haamī haiñ abhī tak

ab un ke liye barsar-e-paikār haiñ ham log

jo baat kahī jab bhī sar-e-dār kahī hai

ġhaddār nahīñ sāhib-e-kirdār haiñ ham log

taqsīm hameñ karne kī jur.at bhī na karnā

ai fitna-garo azm kī dīvār haiñ ham log

ham ne hī jinheñ rasm-e-vafādārī sikhā.ī

ab vo hameñ kahne lage ġhaddār haiñ ham log

maz.hab na kisī zaat na sarhad se hai matlab

mazlūm koī bhī ho madad-gār haiñ ham log

yak-jehtī kī tāqat pe 'tarab' naaz hai ham ko

vaqt aane do dikhlā.eñge tayyār haiñ ham log

har fitna-o-tafriq se bezar hain hum log

sail hain mohabbat ke talabgar hain hum log

hindu na musalman na isai na sikh hain

is mulk ki tahzib ke minar hain hum log

tamir-e-gulistan mein lahu sab ka hai shamil

hai faKHr ki is mulk ke meamar hain hum log

tafriq-o-tassub ke jo hami hain abhi tak

ab un ke liye barsar-e-paikar hain hum log

jo baat kahi jab bhi sar-e-dar kahi hai

ghaddar nahin sahib-e-kirdar hain hum log

taqsim hamein karne ki jurat bhi na karna

ai fitna-garo azm ki diwar hain hum log

hum ne hi jinhen rasm-e-wafadari sikhai

ab wo hamein kahne lage ghaddar hain hum log

mazhab na kisi zat na sarhad se hai matlab

mazlum koi bhi ho madad-gar hain hum log

yak-jehti ki taqat pe 'tarab' naz hai hum ko

waqt aane do dikhlaenge tayyar hain hum log